«Nurly jol» ınfraqurylymdy damytý memlekettik baǵdarlamasyna sáıkes bıyl Shyǵys Qazaqstan oblysynda RF shekarasy (Omby) – Maıqapshaǵaı avtojolynyń Pavlodar oblysynyń shekarasynan Semeı qalasyna deıingi ýchaskede (587-733 shaqyrym) aqyly júıe iske qosylady, dep habarlaıdy Egemen.kz.
Memlekettik baǵdarlamany júzege asyrý josparynyń negizinde Qazaqstan Respýblıkasynyń Indýstrııa jáne ınfraqurylymdyq damý mınıstrligi men «QazAvtoJol» UK» AQ birlesip tólem alýdyń «ashyq júıesin» engizý týraly sheshim qabyldady. Júıeniń ereksheligi – ýchaskelerde shlagbaýmdar bolmaıdy. Avtokólikterdiń júrip ótken joly týraly aqparat arkalarda ornalasqan arnaıy kameralar arqyly tirkeledi.
«Pavlodar-Semeı ýchaskesi II tehnıkalyq sanattaǵy avtojol bolǵandyqtan, tek júk kólikterden ǵana tólem alynatyn bolady. Aldaǵy ýaqytta A pýnktinen B pýnktine deıingi marshrýtty esepteý (uzyndyǵy men baǵasy), jol boıyndaǵy barlyq servıs nysandary kórsetilgen ınteraktıvti karta men PUSH habarlandyrýlar da iske qosylady», delingen QazAvtoJol taratqan málimette.
Aqyly ýchaskege qatysty barlyq máseleler boıynsha paıdaly aqparat berý úshin Semeı qalasynyń shyǵaberisinde klıenttermen jumys isteý ortalyǵy iske qosylady. Sondaı-aq 1403 nómirindegi baılanys ortalyǵyna da habarlasýǵa bolady.