Oblystyq PD baspasóz qyzmetiniń málimetinshe, saǵat 22.06-da polısııaǵa Aqsý qalasynyń mańyndaǵy jol-kólik oqıǵasy týraly habarlama túsken, dep habarlaıdy Egemen.kz.
«Oqıǵa ornyna kelgen polısııa qyzmetkerleri «KamAZ-5320» avtokóliginiń 36 jastaǵy júrgizýshisi basty jolmen, al «Volga» avtokóliginiń 67 jastaǵy júrgizýshisi ekinshi dárejeli jolmen kele jatqanyn anyqtady. «Volga» júrgizýshisi «KamAZ» júrgizýshisine jol bermeı, tótenshe jaǵdaı týdyrǵan. Sonyń saldarynan «KamAZ» júrgizýshisi soqtyǵysýdy boldyrmaý úshin qarsy qozǵalys jolaǵyna shyǵyp, aýdarylyp ketken», dedi baspasóz qyzmetindegiler.
Oqıǵa saldarynan «Volga» avtokóliginiń júrgizýshisi jaraqat alyp, aýrýhanaǵa jetkizildi.
«Volga» avtokóliginiń júrgizýshisine qatysty QR ÁQBtK-niń 610-baby 1-bóligi boıynsha ákimshilik óndiris qozǵalady. Sondaı-aq «KamAZ» avtokóliginiń júrgizýshisine keltirilgen materıaldyq zalaldy óteý máselesi júrgizýshiler arasynda azamattyq tártipte sheshiledi.