Dzıýdo kúresinen Býdapeshte ótip jatqan álem chempıonatynyń alǵashqy kúni Ǵusman Qyrǵyzbaev kúmis medaldi moınyna ilip, barsha qazaqstandyq jankúıerlerdi qýantsa, kelesi táýlikte Eldos Jumahanovtyń ónerin tamashaladyq, dep habarlaıdy Egemen.kz.
66 kılo salmaq dárejesinde synǵa túsken Eldos Jumahanov alǵashqy aınalymda Slovenııanyń saıypqyrany, 2018 jylǵy Eýropa chempıony, 2017 jylǵy sol jarystyń kúmis júldegeri Andrea Gambochty jolynyn yǵystyrsa, ile-shala aýstralııalyq Natan Kats pen mońǵolııalyq Herlen Gandboldan aılasyn asyrdy. Bul básekelerdiń asa shıelenisti ótkeni sonshalyq, jeńimpazdy anyqtaý úshin qosymsha ýaqyt qajet boldy. Bul rette qazaq balýany óziniń jankeshtiligi men tabandylyǵynyń arqasynda jeńiske jetkenin aıta ketýge tıispiz.
Shırek fınalda belarýssııalyq Dmıtrıı Mınkovtan basym túsken Jumahanov jartylaı fınalda álemdik reıtıngtiń kóshbasshysy, bıylǵy jylǵy Eýropa chempıony, ıtalııalyq Manýel Lombardomen aıqasty. Báseke barysynda jaraqat alǵanyna qaramastan qandasymyz baryn saldy. Biraq Apennın túbeginiń túlegi bizdiń jigittiń aldyn orady. Odan keıin Eldos qola medal úshin talasýǵa tıis edi. Alaıda jaraqatyna baılanysty Jumahanov tatamıge shyqpady. Jeńis Mońǵolııanyń ókili Iondonpernenleı Bashýýdiń enshisinde jazyldy.
Al 52 kılo salmaqtaǵy Nursulý Eralıeva óziniń tusaýkeser kezdesýinde Olımpııa oıyndary men álem chempıonatynyń qola júldegeri, Eýropa oıyndarynyń jeńimpazy, qurlyq chempıony, belgııalyq Sharlın van Snıkke san soqtyrǵanymen, kelesi kezdesýde mońǵolııalyq Sosorbaram Lhagvasýrenge ese jiberdi.