Sońǵy úsh jylda joǵary oqý oryndarynyń jataqhanalarynda 20 myńnan astam jańa oryn berildi. Sondaı-aq stýdentterdiń jataqhanalarda turý jaǵdaılary da jaqsardy. 17 joǵary oqý orny stýdentterdiń turǵyn úıge degen qajettiligin tolyǵymen sheshti.
«Stýdenttik jataqhanalarda jańa oryndardy berý elimizdiń barlyq óńirinde júzege asyrylyp jatyr. Berilgen jataqhanalar boıynsha kóshbasshylar qatarynda Nur-Sultan qalasy – 4 060 orynǵa shaqtalǵan 6 jataqhana, Shyǵys Qazaqstan oblysy –10 jataqhana (2 926 oryn), Almaty qalasy – 11 jataqhana (2 698 oryn), Shymkent qalasy – 9 jataqhana (2 434 oryn) paıdalanýǵa berdi. Al Batys Qazaqstan, Aqtóbe, Soltústik Qazaqstan jáne Túrkistan oblystaryndaǵy jataqhanalarda paıdalanýǵa berilgen oryn sany az bolyp otyr», dedi Bilim jáne ǵylym mınıstrliginiń «Qarjy ortalyǵy» AQ prezıdenti Asqar Ibraımov.
Stýdenttik jataqhanalar memleket-jekeshelik áriptestik qaǵıdaty boıynsha salynyp, olardyń qurylysyna ınvestorlar belsendi tartylyp jatyr.
Sonymen qatar jeke ınvestorlardy qosymsha yntalandyrý úshin jataqhanalarǵa asa qajettilik baıqalatyn Nur-Sultan jáne Almaty qalalarynda memlekettik tapsyrys kólemin 47 AEK-ten 92 AEK-ke deıin ulǵaıtý usynylady. Bul baǵytta mınıstrlik tarapynan ǵımarattardy qaıta qurý týraly 14-ten astam memorandým jasaldy.
Jalpy, 2021-2022 jyldary bekitilgen josparǵa sáıkes joǵary oqý oryndarynyń jataqhanalarynda taǵy 55 myń jańa oryn paıdalanýǵa beriledi.
Elbasy Nursultan Nazarbaev «Prezıdenttiń bes áleýmettik bastamasy» atty halyqqa Úndeýinde stýdentterdiń ómir súrý jaǵdaıyn jaqsartýdy jáne 2022 jyldyń sońyna deıin keminde 75 myń orynǵa shaqtalǵan jańa stýdenttik jataqhanalar salýdy qamtamasyz etýdi tapsyrǵanyn aıta ketken jón. Bul stýdentterdi turǵyn úımen qamtamasyz etý máselesin tolyq sheshýge múmkindik beredi.