Mysty shahar Jezqazǵanda erekshe qajettilikteri bar balalarǵa degen qamqor kózqaras qýantady. Mysaly, taıaýda ǵana osy qaladaǵy medısınalyq ortalyq bazasynda ońaltý ortalyǵy ashylyp, burynnan bergi qordalanǵan kóptegen máseleniń oń sheshim tabýyna ıgi yqpalyn tıgize bastady.
Bul ıgilikti isten «Qazaqmys» syndy alpaýyt kásiporyn da tys qalmady. Atap aıtqanda, korporasııa úı-jaıdy jóndeýge, zamanaýı jabdyqtar satyp alýǵa, sonymen birge medısınalyq personaldy oqytý men biliktiligin arttyrýǵa qajetti qomaqty qarajat bóldi.
Atalǵan ortalyqta 18 jasqa deıingi erekshe qajettilikteri bar balalar ońaltýdan óte alady. Bul jerde emdelýshi balalardyń ata-analarynyń qaıda jumys isteıtini mańyzdy emes. Al 18 jastan asqan týabitti múgedektigi bar emdelýshilerdiń ata-analary mindetti túrde «Qazaqmys» korporasııasynda eńbek etýi tıis. Nege deseńiz, olardy ońaltýǵa jumsalatyn shyǵynnyń bárin kompanııa óz moınyna alady.
Jezqazǵandaǵy ońaltý ortalyǵy jaqyn jáne alys shetelderde óndirilgen zamanaýı qural-aspaptarmen jabdyqtalǵan. Atap aıtqanda, Germanııadan ákelingen «Motomed» reabılıtasııalyq trenajeri, vertıkalızator, «Kengýrý» mobıldi qurylǵysy, tirek-qımyl apparaty buzylǵan balalarǵa arnalǵan neıroortopedııalyq saýyqtyrý pnevmokostıými em alýshylarǵa qaltqysyz qyzmet etedi. Sonymen birge ortalyqta túzetý kabınetteri ashylǵan. Al jańa býyn kompıýterlik tomografy buǵan deıingi kóptegen máseleniń sheshim tabýyna septigin tıgizýde.
Qaraǵandy oblysy,Jezqazǵan qalasy