Atyraýda túrkııalyq ınvestordyń qarjylandyrýymen 10 mln dollardyń jobasy iske asyrylýy múmkin, dep habarlaıdy Egemen.kz.
Oblys ákimi Mahambet Dosmuhambetov túrkııalyq «BRIMSTONE Sulphur Provider Company» kompanııasynyń negizin qalaýshy Efe Mýnıp Nýrdoǵdýmen kezdesip, hımııa ónerkásibi salasyna qatysty jobalardy talqylady.
Oblys ákiminiń aıtýyna qaraǵanda, Memleket basshysy Qasym-Jomart Toqaev Qazaqstan halqyna arnaǵan Joldaýynda atap kórsetkendeı, elimizdiń batystaǵy óńirleri munaı-hımııa keshenin salyp, joǵary deńgeıdegi qaıta óńdeý isiniń jańa óndiristik sıkldaryn qurýǵa erekshe nazar aýdaryp otyr. Osy oraıda Atyraý oblysynda da birqatar aýqymdy joba qolǵa alynyp, ınvestısııa tartý jumystary júrgizilip jatyr.
Túrkııa ınvestory Atyraý oblysynda kúkirt betonıtin óndiretin óndiris ornyn ashýǵa nıetti bolyp otyr. Investısııa kólemi shamamen 10 mln AQSh dollaryn quraıtyn jobada 50-ge jýyq adam turaqty jumys istemek.
«Qazaqstanda kúkirttiń jetkilikti qory bar. Alaıda, biz úshin de, jalpy el úshin de shıkizatty tereń óńdeýdi uıymdastyrý, daıyn ónimdi kúkirt bentonıti túrinde shyǵaryp, shetel naryǵyna eksporttaý áldeqaıda tıimdi. Logıstıkalyq turǵydan alǵanda, Atyraý oblysy – bul jobany júzege asyrý úshin óte yńǵaıly ınvestısııalyq alań. Osy oblystan Qytaı, Eýropa men Reseı naryǵyna shyǵýdyń tıimdi tusy kóp», deıdi Mýnıp Nýrdoǵdý.
Onyń aıtýynsha, Túrkııanyń Izmır qalasyndaǵy zaýyt kúkirt pen ilespe ónimderin Eýropa elderine shyǵarady. Túrkııalyq kompanııanyń ónimderi aýyl sharýashylyǵy salasynda ásirese, sortań ári tuzdy jerge tabıǵı tyńaıtqysh retinde qoldanylady.
Sondaı-aq Túrkııa ınvestory «Teńizshevroıl» JShS-niń ókilderimen shıkizatpen qamtamasyz etý máselesine qatysty kelissózder júrgizdi.