Shymkent qalasynda transplantologııa otasy qarqyndy damyp keledi. Aǵza almastyrý otasyn jasaıtyn bilikti medısına mamandarynyń biri – Raqymjan Úmbetjanov. Bilikti maman búginge deıin 500-ge jýyq operasııaǵa assıstent bolyp qatysqan. Búginde Shymkent qalalyq №1 klınıkalyq emhananyń gıpatobılıarly hırýrgııa jáne transplantologııa bóliminde eńbek etip júr, dep habarlaıdy Egemen.kz.
Belarýssııada jasaǵan transplantasııasy R.Úmbetjanovtyń áp-sátte abyroıyn arttyrdy. Onyń bes aılyq sábıdiń baýyryn aýystyryp, oǵan ómir syılaǵany týraly sheteldik aqparat quraldary jarysa jazdy.
Kúrdeli ota birinshi sanatty hırýrg-dárigerdiń kásibıliginiń arqasynda sátti ótti. Sarǵaıyp týylǵan, salmaǵy 7,5 keli tartatyn sábıge anasy baýyrynyń bir bólshegin berdi. «Sabaqty ıne sátimen» degen, ishki aǵzasy aýystyrylmaǵanda balaqaıdyń ómir súrýi ekitalaı edi. Ne kerek, otadan keıin arada 16 kún ótkende naýqastyń beti beri qarady. Anasynyń da jaǵdaıy qalypqa keldi.
«О́mir men ólim arpalysqan sátte jaýapkershilik joǵary bolýy kerek. Bizdiń jumys qatelikti keshirmeıdi. Al transplantasııa – komandalyq eńbektiń jemisi», deıdi aq halatty abzal jan.
Aıta ketý kerek, R.Úmbetjanovtyń jetekshiligimen Belarýssııada jasalǵan ota – alǵashqy aǵza aýystyrý otasy boldy. Osy elde gepatıtpen aýyrǵan er kisige jasaǵan otasy da mamandardyń esinde qaldy. Sırroz saldarynan jaǵdaıy múshkil naýqas qıyn jaǵdaıda aýrýhanaǵa túsken. Jas maman onyń qan qusýyn toqtatyp, naýqasty donorlyq topqa qoıyp, ota jasady. Ol sátti shyǵyp, derti meńdegen kisi saýyǵyp, áli ómir súrip keledi. Munan bólek, elimizdegi 1987 jylǵy boıjetkenge jasalǵan transplantasııa da oń nátıjesin kórsetti. Týysy oǵan baýyrynyń jartysyn bergen edi. 6 jyldan astam ýaqyttan soń naýqas bala súıdi. Qazir onyń ekinshi sábıi bar.
Jas maman buǵan deıin 500-ge jýyq transplantasııaǵa qatysqan. Onyń ishinde Shymkentte 23 baýyr, 160 búırek aýystyrǵan. О́kinishke qaraı, qalada 600-ge jýyq baýyr, 800-ge jýyq adam búırek aýystyrýdy qajet etedi. Biraq olardyń bárine birdeı donor joq.
Bilikti mamannyń aıtýynsha, aǵza almastyrý otasy donor tabylǵandarǵa ǵana jasalyp jatyr.