Ortalyq kommýnıkasııalar qyzmetinde ótken brıfıngte Eńbek jáne halyqty áleýmettik qorǵaý mınıstri Serik Shapkenov karantın ýaqytynda azamattardy qoldaý maqsatynda birqatar baǵdarlamalar qabyldanǵanyn jetkizdi, dep habarlaıdy Egemen.kz.
«Eldegi tótenshe jaǵdaı, karantın kezinde keıbir óndiristerdi, jumys oryndaryn toqtatýǵa týra keldi. Nátıjesinde azamattar jumys istemeı, úıde otyrdy. Osyǵan baılanysty el tarapynan daǵdarysqa qarsy baǵdarlama, Jumyspen qamtý jol kartasy qabyldandy. Sonyń aıasynda byltyr 239 myń jańa jumys orny quryldy, onyń ishinde ýaqytsha jáne turaqty jumys oryndary bar. Biraq azamattardy osy jumys oryndaryna tartý arqyly ótken jyly jumyssyzdyq deńgeıin 4,9% deńgeıinde saqtaı aldyq. Eger bul sharalar der kezinde qabyldanbasa, jumyssyzdyq deńgeıi budan da artyq ósýi múmkin edi», dedi vedomstvo basshysy.