Qazaqstan aldaǵy ýaqytta syrttan qaryz alýdy toqtatady. Bul týraly QR Qarjy mınıstri Erulan Jamaýbaev aıtty, dep habarlaıdy Egemen.kz.
«Qazaqstannyń damý tarıhynda bir emes birneshe daǵdarys boldy. Atap aıtar bolsaq, 1999 jylǵy daǵdarys, odan keıin 2007 jyly Amerıkadaǵy ıpotekalyq qaryzdan bastap, dúnıejúzine tarap Qazaqstanǵa jetken daǵdarys, 2014-2015 jyldardaǵy munaıdyń kúrt quldyraýynan týyndaǵan daǵdarys bar. Al 2020 jyly jetken jaı daǵdarys emes. Ol koronavırýspen qabattasqan óte kúrdeli daǵdarys boldy», dedi mınıstr Ortalyq kommýnıkasııalar qyzmetindegi baspasóz máslıhatynda.
Onyń aıtýynsha, ótken jylǵy daǵdarystyń halyqqa da, kásipkerlerge de aýyr tııýine baılanysty elimiz syrttan qaryz aldy.
«Biraq, alynǵan qaryzdyń kólemi qaýipsizdik deńgeıinde saqtalyp tur dep aıtýǵa bolady. Jalpy, shetelden alynǵan qaryzdardyń basym bóligi kásipkerlerdiń, ıaǵnı sheteldik kompanııalardyń osy jerdegi enshilis kompanııalary arasynda qalyptasqan qaryz. Aldaǵy ýaqytta múmkindiginshe syrttan qaryz alýdy doǵaryp, ekonomıkanyń munaıǵa baılanysty salalaryn ártaraptandyryp, damytyp, solardan túsetin salyq esebinen jaǵdaıdy túzýge tolyq múmkindigimiz bar deýge bolady», dedi Erlan Jamaýbaev.