QR Saýda jáne ıntegrasııa mınıstrligi men BTS Education arasyndaǵy yntymaqtastyq sheńberinde Qazaqstan stýdentterine arnalǵan Elektrondy kommersııa kýrsy ázirlendi, dep habarlaıdy Egemen.kz.
Saýda jáne ıntegrasııa mınıstrligi elektrondy saýdanyń damýyn yntalandyrý jáne onyń úlesin 15%-ke deıin kóterý maqsatynda josparly jumys júrgizýde.
Atalǵan baǵyt boıynsha stýdentterdiń basym bóligine elektrondy kommersııa negizderin oqytýǵa qatysty belsendi jumys qolǵa alyndy.
Osyǵan baılanysty BTS Education kompanııasy QR Saýda jáne ıntegrasııa mınıstrligimen aradaǵy Memorandýmǵa sáıkes Qazaqstan jastaryna arnalǵan elektrondy kommersııa kýrsyn jasap shyǵardy.
Kýrstyń maqsaty – onlaın aqsha tapqysy keletinderdiń barlyǵyn oqytý, elektrondy kommersııa trendteri jaıynda áńgimeleý.
Kýrs www.JumysBar.kz platformasynda qoljetimdi. Qazirgi sátte Internettegi jeke blogty júrgizý jáne monetızasııalaý týraly alǵashqy shaǵyn kýrs oryn alyp úlgerdi. Kez kelgen qazaqstandyq ózine yńǵaıly ýaqytta, onlaın formatta, qalaǵan sátte qaıtalaý múmkindigimen, elektrondy qurylǵy kómegimen oqı alady. Suranysqa ıe mamandyqty basynan bastap ıgerýge tamasha múmkindik bar.
Taıaý ýaqyttarda ózekti taqyryptar boıynsha shaǵyn kýrstar toptamasyn iske qosý josparlanyp otyr. Aı saıyn jańa daǵdylardy oqytatyn jańa shaǵyn kýrs daıyndalyp, kópshilikke usynylmaq, máselen, áleýmettik jelilerde paraqshalar júrgizý, ınternet-dúken ashý, halyqaralyq onlaın alańdarda taýar satý jáne t.b.
Árbir teorııalyq materıaldan soń ózin-ózi tekserý suraqtary ashylady.
Sondaı-aq onlaın bıznes salasyndaǵy tabysty kásipkerlermen suhbattar, otandyq bıznesmenderdiń jetistikke jetý tarıhy jarııalanatyn bolady.