Italııa quramasy qatarynan ekinshi matchta 3:0 esebimen jeńiske jetti. Bul joly «Skýadra Adzýra» Shveısarııany tas-talqan etti. Osylaısha, Italııa alǵash bolyp kelesi kezeńge shyqty, dep habarlaıdy Egemen.kz.
Match bastala sala Italııa fýtbolshylary alǵa lap qoıdy. Sonyń nátıjesinde 19-mınýtta Apennın túbeginiń ókilderi gol salǵan. Aıyp alańyndaǵy qarbalastyń birinde buryshtamadan kóterilgen dopty qorǵaýshy Kellını qaqpaǵa dál baǵyttady. Degenmen tóreshiler VAR-dy tekserip, dop ıtalııalyq fýtbolshynyń qolyna tıip ketkenin anyqtady. Sóıtip, gol esepke alynǵan joq.
Áıtse de, kóp uzamaı ıtalııalyqtar esep ashty. 26-mınýtta Berardı qaptaldan oıqastap kelip, dopty aıyp alańyna teýip jibergen edi. Oǵan basqalardan buryn jetken Lokatellı qaqpashyny qapy qaldyryp ketti. Esep 1:0. Birinshi taımda esep ózgergen joq.
Ekinshi taım bastala sala Italııa fýtbolshylary esepti eseleı tústi. 51 mınýtta ortalyq alańdaǵy olqylyqty tıimdi paıdalanǵan Lokatellı alystan qaqpany dál kózdedi. Shveısarııa qaqpashysy Zommer qozǵalyp ta úlgergen joq.
Budan keıin de Apennın túbeginiń fýtbolshylary báseńsigen joq. Ásirese, shabýylshy Chıro Immobıle birneshe márte urymtal tustan gol soǵa alǵan joq. Áıtse de, oıyn aıaqtalar tusta Immobıle aıyp alańynyń syrtynan shirene teýip, qaqpa toryn búlk etkizdi.
Aıta keterligi, qorǵaýshy Djordjo Kellınıo Eýropa chempıonatynda 14-shi matchqa qatysyp, ıtalııalyq fýtbolshylar arasynda rekord ornatty. Alaıda ol oıyn kezinde jaraqat alyp qaldy.Italııa – Shveısarııa 3:0Goldar:1:0 – 26 Lokatellı, 2:0 – 52 Lokatellı, 3:0 – 89 Immobıle.Italııa – Donnarýmma, Kellını (Acherbı, 24), Dı Lorenso, Bonýchchı, Spınassola, Barella (Krıstante, 87), Jorjıno, Insıne (Keza, 69), Lokatellı (Pessına, 86), Berardı (Toloı, 70), Immobıle.Shveısarııa – Zommer, Mbabý (Vıdmer, 58), Sher (Sýber, 57), Elvedı, Rodrıges, Djaka, Froıler (Soý, 84), Shakırı (Vargas, 76), Akandjı, Embolo, Seferovıch (Gavranovıch, 46).Eskertý alǵandar:Gavranovıch (49), Embolo (79).