Qazaqtyń atyn dúnıe júzine tanytqan jyr alyby Jambyldyń Almaty oblysy Jambyl aýdanyndaǵy ádebı- memorıaldyq mýzeıine kezinde álemniń ár túkpirinen aqyn-jazýshylar, mádenıet qaıratkerleri, óner ókilderi, onyń ómiri men óleńine tánti basqalar da aǵylyp kelip jatatyn.Árıne, qazir de bul qasıetti orynǵa at basyn buratyndar az emes, alaıda olar negizinen alǵanda óz elimizdiń azamattary.
Sonaý 1973 jyly atalǵan mýzeıde bir týǵan qyrǵyz halqynyń uly jazýshysy, shyraıly shyǵarmalarymen alty qurlyqqa aıryqsha tanylǵan, oı-sanańa, jan-júregińe keremet áser etetin roman, hıkaıat, áńgimeleri toptastyrylǵan kitaptary san alýan tilge aýdarylyp basylǵan tamasha qalamger Shyńǵys Aıtmatov ta bolǵan eken.
Sonda osy mýzeıdi on úsh jyl boıy baıypty basqarǵan, qazaq balalar ádebıetiniń kórnekti ókiliniń biri, baldyrǵandarǵa arnalǵan ertegi jazýdyń shynaıy sheberi, bıylǵy mamyr aıynda týǵanyna 85 jyl bolǵan marqum Muhametjan Etekbaev áıelimen birge retin taýyp Shyqańnyń aldynan kishkentaı balasyn (onyń atyn yrymdap Shyńǵystaı shyńǵa shyqsyn dep Shyńǵys qoıǵan) alyp shyqqan ǵoı...
– Ol bir, bir jarym jastaǵy kezim, – deıdi Shyńǵys Etekbaev. – Myna sýrette Shyńǵys Tóreqululynyń meni qolyna ustap turǵany beınelengen. Janyndaǵylar anam Hazıma Aıdarbekova men ákem Muhametjan. Al oń jaq shettegi – uly Jambyldyń balasy Álimqul Jambylov.
Búginde Jambyl aýdanyndaǵy Qaraqystaq aýylynda turatyn kishi Shyńǵys anasy Hazımamen (qazaqtyń ataqty aqyldy baıy, úlken mesenat Medeý Pusyrmanovtyń shóberesi bolyp keledi) birge qarashańyraq – týǵan úıdiń tútinin túzý ushyryp, áke jaqqan otbasy otyn óshirmeı otyr!..
Berikbaı QADYQOV,
jýrnalıst