Elimizdegi halyqqa qyzmet kórsetý ortalyqtary men vokzaldar kelýshilerdi tek Ashyq qosymshasymen qabyldaıtyn boldy. Eger júıede mártebeńiz «jasyl» ne «kók» bolsa, atalǵan ǵımarattarǵa kire alasyz, al «qyzyl» men «sarylar» ishke ene almaıdy.
Búginde áýejaılar, kásipkerlik, mádenıet jáne sport nysandary Ashyq qosymshasymen jumys istep jatqany belgili. Bas memlekettik sanıtarlyq dárigerdiń jaqynda taǵy bir Qaýlysy shyqty. Osy qujat boıynsha endi elimizdiń barlyq qalasyndaǵy halyqqa qyzmet kórsetý ortalyqtary kelýshilerdi Ashyq servısinen ótkizetin boldy. Eger qosymshada azamattyń mártebesi «jasyl» nemese «kókshil», ıaǵnı teris nemese beıtarap bolsa, onda olar kezekti aldyn ala brondamaı-aq HQO kórsetetin memlekettik qyzmetti ala beredi.
«Bul zamanaýı servıs negizinde HQO-lar klıentterdi kóbirek qabyldap qana qoımaı, sonymen qatar qyzmetkerler men kelýshilerdiń qaýipsizdigin qamtamasyz ete alady. Bul rette kezekke aldyn ala brondaý múmkindigi burynǵysha qala beredi. Onyń basty artyqshylyǵy – kelýshi aldyn ala belgilengen ýaqytta kelip, operatordyń qabyldaýyna birden óte alady», deıdi «Azamattarǵa arnalǵan úkimet» korporasııasynyń basqarma tóraǵasy Ádil Qojyqov.
Eger azamattardyń smartfonynda Ashyq qosymshasy bolmasa, olar taıaýda ǵana Ashyq fýnksıonaly engizilgen eGov mobile, Kaspi.kz jáne Halyk Homebank qosymshalaryn paıdalana alady. Eger bul qosymshalar da bolmasa, onda azamattardyń mártebesin JSN arqyly HQO qyzmetkeri anyqtap beredi.
«Álbette, múndaı qadam HQO-ǵa kelýshiler sanyn kóbeıtetinin túsinemiz. Sondyqtan barshańyzdy sanıtarlyq qaýipsizdik sharalaryn qatań saqtaýǵa shaqyramyz. Mindetti túrde betperde taǵyp, áleýmettik qashyqtyqty saqtap, sanıtaızerlerdi qoldanýdy umytpaǵaısyzdar», dep eskerte ketti Á.Qojyqov.
Ashyq qosymshasymen jumys isteýge baılanysty qazirgi tańda qalalardaǵy árbir front-keńseniń kireberisinde skanerleý úshin arnaıy derbes QR-kod ilingen. Eger azamatty teksergen kezde «sary» ne «qyzyl» mártebe anyqtalsa, onda olardy ǵımaratqa kirgizbeıdi.
Bas sanıtarlyq dárigerdiń 2021 jyldyń maýsymyndaǵy qaýlysyna sáıkes, bıylǵy 17 maýsymnan bastap, «Nurly jol» temirjol vokzaly kesheninde de Ashyq jobasy engizildi. Al 21 maýsymnan bastap, Almaty-1, Almaty-2, Qaraǵandy jáne О́skemen vokzaldarynda da osy joba jumys isteı bastaıdy.
1 shildeden bastap, Aqtóbe, Atyraý, Beıneý, Kókshetaý, Qostanaı, Qyzylorda, Mańǵystaý, Oral, Pavlodar, Semeı, Taraz, Túrkistan, Shymkent jáne Shý vokzaldary osy júıemen jolaýshylardy qabyldaıdy. Bárinde de tártip birdeı: Ashyq jobasynda mártebesi «jasyl» jáne «kók» bolǵandar vokzalǵa kiredi de «sary» men «qyzyl» janǵandar ishke óte almaıdy. «Bul shara koronavırýstyq ınfeksııanyń taralý qaýpin azaıtyp, vırýsty órshitetin baılanystar sanyn qysqartý maqsatynda engizilip otyr», deıdi «Qazaqstan temirjoly»UK» AQ baspasóz qyzmeti taratqan málimette.
QR-kodty skanerleıtin Ashyq kirý júıesi «Nurly jol» vokzal kesheniniń barlyq kireberisinde ilindi. Jolaýshylar arasyndaǵy ara qashyqtyqty saqtaý úshin vokzal qyzmetkerleri kelýshilerdi bólip kirgizedi. «Jolaýshy vokzalǵa kirerde QR-kodty Ashyq mobıldi qosymshasy arqyly nemese Kaspi.kz, Homebank, Aity qosymshalary arqyly skanerleý qajet. Jolaýshyda qosymsha nemese smartfon bolmaǵan jaǵdaıda vokzal qyzmetkerine JSN kórsetý qajet. Sheteldikterdiń mártebesi tólqujattyń nómiri boıynsha tekseriledi. 18 jasqa deıingi balalar tekserýden ótpeıdi. «Qyzyl» jáne «sary» mártebesi bar adamdardy vokzalǵa kirgizbeımiz. Sondyqtan www.ashyq.kz caıtyna kirip, beıtarap QR-kod arqyly mártebeńizdi aldyn ala anyqtap alǵanyńyz jón», deıdi AQ mamandary.
Al poıyzǵa bılet alyp qoıǵan, biraq Ashyq qosymshasynda mártebesi «qyzylmen» nemese «sarymen» belgilengender ne isteıdi? Bul jolaýshylar vokzalǵa kire almaıdy. Tipti paıdalanylmaǵan jol júrý qujatyn (bıletin) qaıtarý úshin kassaǵa da bara almaıdy. «Vokzalǵa kire almaıtyn jolaýshylar bıletin ótkizý kerek. Ol úshin WhatsApp mobıldi qosymshasy arqyly bilet.railways.kz saıtynda kórsetilgen telefon nómirine (+7 707 270 36 64) habarlasyp, bılettiń jáne Ashyq qosymshasyndaǵy mártebesiniń fotosýretin nemese skrınshotyn, jeke kýáligin jiberýi kerek, deıdi mamandar.