Sársenbiden beısenbige qaraǵan túni fýtboldan Eýropa birinshiliginiń toptyq týrnırdegi sońǵy saıystary ótti. Sevılıada Slovakııa men Ispanııa kúsh synassa, Sankt-Peterbýrgte Shvesııa men Polsha sheberlik baıqasty. Osy matchtar aıaqtalǵannan soń Germanııa men Majarstan jáne Portýgalııa men Fransııa arasyndaǵy tartysty tamashaladyq. Bir keremeti, bul básekelerdiń barlyǵy da iri eseppen aıaqtaldy.
Sevılıadaǵy matchtyń 12-mınýtynda Slovakııanyń qaqpasyna penaltı belgilendi. 11 metrlik núktege Alvaro Morata keldi. Madrıdtiń «Atletıko» klýbynyń shabýylshysy baǵyttaǵan dopty Martın Dýbravka keri qaıtardy. Bir sátte asqan sheberligimen tórtkúl dúnıeni tamsandyrǵan ol arada biraz ýaqyt ótkende óz jankúıerlerin jerge qaratty. Dýbravka áýelep kelip, mańdaıshaǵa tıgen dopty alańnyń syrtyna shyǵaramyn dep óz qaqpasyna soǵyp aldy. Sol jaǵdaıdan keıin-aq slovakııalyqtardyń saly sýǵa ketti. Match aıaqtalǵanǵa deıin olar alań ıeleriniń ekpinine shydas bere almady. Laıyqty qarsylyq kórsetý bylaı tursyn, Shtefan Tarkovıchtiń shákirtteri birde-bir qaýipti shabýyl uıymdastyra almaı, ábden ábigerge tústi.
Al Pıreneı túbeginiń túlekteri kerisinshe, jasyl alańda erkin oıqastap, oılaryna kelgenin istedi. Birinshi kezeńniń sońǵy sekýndynda Emerık Lıaport mergendik tanytsa, úzilisten keıin Pablo Sarabııa men Paý Torrestiń tepken doptary torda týlady. Ol az deseńizder, Iýraı Kýska taǵy bir avtogoldyń avtory atandy. Nátıjesinde, Ispanııa quramasy 5:0 esebimen Slovakııanyń tas-talqanyn shyǵardy.
Shvesııa men Polsha quramalary arasyndaǵy kezdesý bastalǵan bette Emıl Forsberg óz komandasyn alǵa shyǵardy. 59-mınýtta dál sol oıynshy ekinshi goldy salǵanda Skandınavııa túbeginen kelgen saıypqyrandardyń bul básekeni óz paıdasyna sheshetinine eshkimniń kúmáni bolmady. Biraq polıaktar da aıanyp qalmady. 61 jáne 84-mınýttarda Robert Levandovskıı nysanany qatarynan eki ret dál kózdep, óz jankúıerleriniń keýdesinde úmit otyn mazdatty. Desek te 90+3 mınýtta tájirıbeli Vıktor Klaessonnyń alymdylyǵy men alǵyrlyǵynyń arqasynda shvedter asa mańyzdy matchta jeńiske jetti. Esep – 3:2.
Mıýnhendegi «Allıans Arenada» ótken matchta tosyn nátıje tirkelýge shaq qaldy. Birinshi taımnyń basynda Adam Salaı esep ashty. Tarazy basyn teńestirý úshin nemisterge baqandaı 55 mınýt qajet boldy. Desek te Kaı Haverstiń soqqan dobyna jergilikti jankúıerler qýanyp ta úlgermedi. Arada eki mınýt ótpeı jatyp Andrash Shafer Majarstan quramasyn qaıta alǵa shyǵardy. Eger de osy esep saqtalsa, Germanııanyń fýtbolshylary pleı-offtan tys qalatyn edi. Al bul degenińiz sensasııanyń «kókesi». Biraq áýpirimdep júrip, Ioahım Lıov baptaǵan komanda kózdegen maqsatyna qol jetkizdi. 84-mınýtta Leon Goreska nemisterdi bul masqaradan qutqardy. Esep – 2:2.
Fransııa men Portýgalııa quramalary da dál sondaı eseppen tarasty. Bul matchta úsh dop penaltıden kirdi. Ekeýin Krıshtıaný Ronaldý (30 jáne 60-mınýttar) soqsa, bireýin Karım Benzema (45-mınýt) saldy. Sondaı-aq taǵy bir goldy dál sol Benzama óz enshisine jazdy. 2:2 esebi eki komandany da qanaǵattandyrdy. Osy oraıda Portýgalııa quramasynyń juldyzy Krıshtıaný álem jáne Eýropa chempıonattarynda soqqan goldaryn 21-ge jetkizdi. Bul – rekordtyq kórsetkish. Sonymen qatar ulttyq komanda sapynda Ronaldý 109 ret nysanany dál kózdep, Irannyń surmergeni Álı Deaıdyń nátıjesin qaıtalady.
Sóıtip pleı-off dodasyna joldama alǵan 16 myqty anyqtaldy. Endi 1/8 fınaldyq básekede myna komandalar ózara kúsh synasady: Ýels – Danııa (26 maýsym, Amsterdam), Italııa – Aýstrııa (27 maýsym, London), Nıderland – Chehııa (27 maýsym, Býdapesht), Belgııa – Portýgalııa (28 maýsym, Sevılıa), Horvatııa – Ispanııa (28 maýsym, Kopengagen), Fransııa – Shveısarııa (29 maýsym, Býharest), Anglııa – Germanııa (29 maýsym, London) jáne Shvesııa – Ýkraına (30 maýsym, Glazgo).