QR AShM AО́K memlekettik ınspeksııa komıtetiniń aqparaty boıynsha, bıyl Aqtóbe oblysynda úıirli shegirtkeler 70,39 myń gektarǵa taralýy múmkin degen boljam bar, dep habarlaıdy Egemen.kz.
«Aqtóbe oblysy Áıteke bı aýdanynyń Basqudyq, Jabasaq, Sarat, Aqtasty, Aqkól jáne Qumkudyq aýyldyq okrýgteriniń aýmaǵynda shegirtkeniń ıtalııalyq prýs túrimen kúres boıynsha fıtosanıtarııalyq qorǵaý sharalary jalǵasýda. Bul jumystarǵa 9 birlik tehnıka, onyń ishinde eki gaz generatory, bir ushaq jáne 6 jerústi búrikkishteri jumyldyryldy. О́ńdeý ýaqtyly, ǵylymı negizdelgen merzimde bastaldy», dedi QR Aýyl sharýashylyǵy mınıstrliginiń Agroónerkásip keshenindegi memlekettik ınspeksııa komıtetinen.
Mamandar hımııalyq óńdeýdiń maksımaldy tıimdiligin qamtamasyz etý úshin shegirtkeler belsendi emes kúıde bolǵan kezde keshki jáne tańerteńgi ýaqytta júrgiziletinin aıtady.
Sondaı-aq, komıtet ınsektısıdterdiń barlyq qajetti kólemi aımaqqa ýaqtyly jetkizilgenin, hımııalyq óńdeý qyzmetterin atqaratyndarmen aldyn ala kelisimsharttar jasalǵanyn atap ótti. Áıteke bı aýdanynyń aýmaǵynda «Enjıo», «Lokýstın», «Zelenyı Barer», «Grıngold», «Vanteks» jáne «Sıprofen»preparattarymen óńdeý jumystary júrgizilýde.
QR AShM AО́K memlekettik ınspeksııa komıtetiniń aqparaty boıynsha, bıyl Aqtóbe oblysynda úıirli shegirtkeler 70,39 myń gektarǵa taralýy múmkin degen boljam bar. Al jalpy respýblıka boıynsha zııankester 640 myń gektardan astam alańǵa taralýy múmkindigi boljanýda.
«Pestısıdter men hımııalyq óńdeý qyzmetteri barlyq boljamdy alańǵa satyp alyndy. Sonymen qatar, 223 myń gektarǵa jetetin pestısıd qory bar.
Úıirli shegirtkelerdi tıimdi óńdeý úshin pestısıdterdiń túrli toptarynyń preparattary satyp alyndy. Bul baǵyt boıynsha oblys ákimdikterimen birlese jumys isteý júıesi ázirlendi. Qazirgi ýaqytta oblys ákimderiniń orynbasarlary basqaratyn jedel shtabtar quryldy. Sondaı-aq monıtorıng jáne hımııalyq óńdeý jumystaryn uıymdastyrý jónindegi jumys josparlary bekitildi», dep qosty komıtetten.
Málimetke súıensek, úıirli shegirtke zııankesteriniń oshaqtaryn anyqtaý úshin 38,4 mln gektar jer zertteledi. Bul jumysty júrgizý úshin 524 avtokólik pen 1230 tekserýshi tartylady.
«Respýblıkanyń Túrkistan jáne Jambyl oblystarynda marokko shegirtkesine qarsy óńdeý jumystary aıaqtaldy. Al, Aqtóbe oblysynda ıtalııalyq prýsqa qarsy óńdeý jumystary jalǵasýda.
Úıirli shegirtkege qarsy kúres boıynsha jaǵdaı Qazaqstan Respýblıkasy Aýyl sharýashylyǵy mınıstrliginiń turaqty baqylaýynda», dedi QR AShM Agroónerkásip keshenindegi memlekettik ınspeksııa komıtetinen.