«Nazarbaev ortalygy» vırtýaldy týryn QR Prezıdentiniń «Bolashaq» halyqaralyq stıpendııasynyń túlekteri ázirledi. Elimizdiń Tuńǵysh Prezıdenti Nursultan Nazarbaevtyń 1997-2004 jyldary jumys istegen rezıdensııasyn kompıýterden de, smartfonnan da kórýge bolady, dep habarlaıdy Nur-Sultan qalasy ákimdiginiń resmı saıty.
Vırtýaldy týr QR Prezıdentiniń «Bolashaq» halyqaralyq stıpendııasy túlekteriniń qaýymdastyǵy men elorda ákimdiginiń qoldaýymen QR Táýelsizdiginiń 30 jyldyǵy jáne qaýymdastyqtyń 20 jyldyq mereıtoıyna oraı ázirlendi.
Elbasy Kitaphanasynyń Mýzeıi Qazaqstan Respýblıkasynyń Tuńǵysh Prezıdenti Rezıdensııasynyń ǵımaratynda ornalasqan, onda ol 1997-2004 jyldar aralyǵynda elorda Almatydan Astanaǵa kóshkennen keıin jumys istegen.
Elbasynyń kabıneti, qabyldaý bólmesi men májilis zaldary sol jyldardaǵy jumys kúnderiniń atmosferasyn sezinýge múmkindik beredi. Sonymen qatar, kitaphana mýzeıinde Nursultan Nazarbaevtyń ómiri men qyzmeti arqyly táýelsiz Qazaqstannyń qalyptasýy men damýynyń negizgi kezeńderin ashyp kórsetetin biregeı eksponattar usynylǵan.
Derbes kitaphana qorynyń negizin Elbasynyń Qazaqstan Respýblıkasynda jáne shetelde shyǵarylǵan kitaptary men onyń avtorlyq týyndylary; avtorlardyń birinshi Prezıdentke bergen kitaptary men basqa da baspa basylymdary; sırek kezdesetin, kolleksııalyq jáne syılyq basylymdary; bıobıblıografııalyq jáne bıblıografııalyq kórsetkishter men elektrondyq basylymdar quraıdy.
Kitaphananyń árbir bólimi kezeń-kezeńimen Qazaqstan Respýblıkasynyń Tuńǵysh Prezıdenti tulǵasynyń aýqymyn, Elbasynyń ulttyq jáne álemdik tarıhtaǵy erekshe rólin ashyp kórsetedi. Biregeı tarıhı qujattar, arhıvtik foto jáne beınematerıaldar, jeke qujattardyń kóshirmeleri, Elbasy kitaphanasynyń mýzeı, kitaphana jáne arhıv qorlarynyń gazettik jarııalanymdary men eksponattary táýelsiz Qazaqstan tarıhynyń asa mańyzdy oqıǵalarynyń atmosferasyna enýge múmkindik beredi.
Joba betinde paıdalanýshy dıspleı qoraptaryn «qarap», kamera beınesi bar belgishelerdi basý arqyly ortalyqty vırtýaldy túrde zertteı alady. Ekranda qysqasha anyqtamalary bar fotosýretter paıda bolady — olardy slaıd sekilli aınaldyryp kórýge bolady.