Atyraý oblysyndaǵy Aqjaıyq aýylynda 1,4 mlrd teńgeni quraıtyn jylyjaı salynyp jatyr, dep habarlaıdy Egemen.kz.
Aqjaıyq aýyly – Mahambet aýdanynda ornalasqan okrýgtiń biri. Jaıyq ózeniniń jaǵasyndaǵy iri eldi mekendegi sharýashylyǵy qanat jaıǵan. Qazir munda 4 gektar aýmaqta iri jylyjaı qurylysy qolǵa alynypty.
«Jumaǵalıeva N» sharýa qojalyǵynyń jetekshisi Ospan Almastyń aıtýynsha, jobanyń quny 1,4 mlrd teńgeni quraıdy. Jylyjaıdy tórtinshi toqsanda iske qosý josparlanyp otyr.
«Qurylys alańynda 14 adam jumys isteıdi. Qazir jylyjaı nysanynyń qabyrǵasy qurastyryla bastady. Elektr jáne gaz jelisi tartyldy. Bul jylyjaı iske qosylǵanda 350 adamdy jumyspen qamtýdy josparlap otyrmyz. Munda jylyna 350 tonna qııar, qyzanaq syndy kókónis ónimderi ósiriledi», deıdi Ospan Almas.
Jylyjaı qurylysymen tanysqan oblys ákimi Mahambet Dosmuhambetov azyq-túlik beldeýin qurý úshin mundaı jobalardyń qajettigine toqtaldy.
«Memleket tarapynan aýyl sharýashylyǵy salasyn damytýǵa barynsha qoldaý kórsetilip otyr. О́ńir turǵyndaryna sapaly ári arzan kókónis ónimderin usynýdy kózdeıtin bul jylyjaıda da jumys oryndary ashylady. Jylyjaı ónimderi jergilikti naryqtaǵy baǵanyń turaqty bolýyna yqpal etedi. Sondyqtan, osyndaı jobalardy kóbirek iske qosý qajet», dedi Mahambet Dosmuhambetov.