Qarjy pıramıdasynyń negizgi belgileri qandaı? Oǵan tap bolǵan adam ne isteýi kerek? Bul týraly QR Qarjylyq monıtorıng agenttigi jazdy, dep habarlaıdy Egemen.kz.
Qarjy pıramıdasynyń negizgi belgileri:
- Uıymǵa kirý úshin, belgili bir qyzmetterdi alý úshin aldyn ala qomaqty qarajat quıý kerek. Ol úshin qolma-qol aqsha, ártúrli ınternet-tólemder men aýdarym júıesin paıdalanady. Kompanııanyń banktegi arnaıy esep aıyrysý shotyn qoldanbaıdy.
- Salynǵan qarajatty az ýaqyt ishinde birneshe eselep qaıtarýdy ýáde etý;
- Tólemdi alý úshin basqa adamdardy da osy uıymǵa aqsha quıýǵa úgittep, kóndirý qajet;
- Joba «noý-haý» retinde usynylady;
- Kompanııa qarajat jınaý maqsatynda tirkelgen. Jarǵylyq kapıtaly eń tómen jáne jalǵyz quryltaıshysy bar. Tirkeýdi QR QM Memlekettik kirister komıtetiniń saıtynda «Salyq tóleýshilerdi izdeý» servısi arqyly tekserýge bolady;
- Áleýmettik jelilerde belsendi jáne túrli-tústi jarnama, túrli prezentasııa, utys oıyndary, syılyqtar, joldamalar oınatady, paraqshalarǵa jazylýǵa úgitteıdi nemese e-mail arqyly jarnama taratady;
- Eger bir nárse durys bolmaı qalsa, jaýapkershilik eshkimge júktelmeıdi. Shartta bul nusqa qarastyrylmaǵan;
- Kompanııa ózin «mıkroqarjy uıymy», «nesıe bıýrosy», «qaryzǵa qarsy baǵdarlama», «qarjylyq qyzmetter ortalyǵy» retinde tanystyrady. Jarnamasy «Siz bankten bas tarttyńyz ba? Biz kómektesemiz!», «Bereshekten qutylýǵa kómektesemiz!», «Aqshańyzdy kóbeıtińiz», «Táýekelsiz passıvti kiris» jáne t.b. urandarmen birge júredi;
- Uıymda QR Qarjy naryǵyn retteý jáne damytý agenttiginiń lısenzııasy joq.
Mysaly, «Finiko» kompanııasy aqshany joǵary paıyzben qaıtaryp alýdy usynady, ol úshin bastapqy somany salý qajet, paıdalanýshyǵa CFR krıptovalıýtalaryn jáne ózge ınvestısııalyq quraldardy satyp alýdy usynady, QNRDA-niń lısenzııasy joq, ózderin «paıda tabýdyń avtomattandyrylǵan júıesi» retinde jarnamalaıdy, aqshany tek qolma-qol nysanda qabyldaıdy nemese Qiwi-ámııandar, Iаndeks-aqsha, Easy Pay, PayPal jáne basqalary sııaqty ınternet-tólemder men aýdarymdardy qoldanady. Osylaısha, 10 belginiń jeteýi qarjy pıramıdasynyń belgisine sáıkes keledi.
Atalǵan belilerge saı uıymdarǵa tap kelgen adamdar Qarjylyq monıtorıng agenttigine nemese aýmaqtyq qarjylyq monıtorıng organyna júgine alady. QMA senim telefony: +7 (7172) 708-478.