«Otandastar» qory shetelde tirkelgen 250 qazaq mádenı ortalyǵynyń 71-imen memorandým bekitti. Bul týraly «Otandastar qory» KEAQ vıse-prezıdenti Maǵaýııa Sarbasov aıtyp berdi, dep habarlaıdy Egemen.kz
«Otandastar qory» óz jumysyn 2018 jyly bastady. Qor qurylǵanǵa deıin aýqymdy is-sharalardy Dúnıejúzilik qazaqtar qaýymdastyǵy atqarǵan.
«Búginde qoǵam 4 baǵytta jumys atqarady. Birinshi, shetel qazaqtarynyń ulttyq biregeıligin saqtaý maqsatynda mádenı-gýmanıtarlyq jobalar uıymdastyrý. Ekinshi, elimizge kóship kelgen qandastarymyzǵa qoǵamǵa beıimdelýine járdem etý. Úshinshi, sheteldegi qazaqtardyń áleýmettik ahýaly men otandastarymyzben jumys jasaýdyń halyqaralyq ozyq tájirıbesin zertteý. Tórtinshi, sheteldegi qazaq jastarymen baılanys ornatý, olardy Qazaqstanǵa tartý», dep túsindirip ótti Maǵaýııa Sarbasov Ortalyq kommýnıkasııalar qyzmetinde ótken baspasóz konferensııasynda.
Maǵaýııa Sarbasovtyń aıtýynsha, kelesi jyly Dúnıejúzi qazaqtary qaýymdastyǵynyń 30 jyldyq mereıtoıy ótkizilmek. Onyń aıasynda úlken quryltaı ótkizý josparlanyp otyr.
Ártúrli derekter boıynsha, qazirgi kezde shet elderde 5-7 mln qazaq turady. Olardyń naqty sanyn aıqyndaý úshin zertteý jumystary júrgizilip jatyr.
Sonymen qatar búgingi kúni Úkimettiń qaýlysy boıynsha «Sheteldegi etnıkalyq qazaqtardy qoldaý jónindegi 2018-2022 jyldarǵa arnalǵan is-sharalar jospary» qabyldandy.
«2018 jyly «Otandastar» qory qurylǵan sátten bastap, sheteldegi qazaqtardy biriktiretin ulttyq mádenı ortalyqtardy túgendeý jumystaryna belsene kiristi. Ol jumysqa Syrtqy ister mınıstrligi men elshilikteri de úles qosty. Sonyń nátıjesinde álemde 250-ge jýyq qazaq mádenı ortalyqtary bar ekeni, onyń 150-i belsendi jumys isteıtini anyqtaldy. Búginde olardyń barlyǵymen baılanys ornatylyp, 71 ortalyqpen ózara yntymaqtastyq týraly Memorandýmǵa qol qoıyldy», dedi M. Sarbasov.