Bul týraly Syrtqy ister mınıstriniń burynǵy orynbasary, Qazaqstan Respýblıkasynyń AQSh-taǵy Tótenshe jáne О́kiletti Elshisi Erjan Ashyqbaev aıtty, dep jazady Egemen.kz.
«Qazaqstan – jalpy osy soǵys aımaqtarynan óz azamattaryn alǵan alǵashqy memleketterdiń biri boldy. Al birneshe aılar, jyldar boıy qaqtyǵys aımaǵynda ómir keshken jandar, ásirese, balalar men analar kómekke zárý edi. Ony «Jýsan» operasııasyna tikeleı qatysqan áriptesterimiz óz kózimen kórdi. Sondyqtan keıbir kórshiles memleketterdiń azamattary da «Biz – qazaqstandyqtarmyz, bizdi de ala ketińizder», dep jaǵdaılaryn aıtýǵa tyrysty, biraq biz tek Qazaqstan azamattaryn ǵana alyp keldik. Ol úshin tıisti jumystar júrgizildi. Tipti ákesiz, anasyz qalǵan jetim balalarǵa qatysty DNK testterine deıin júrgizip, kózimiz jetkende ǵana, ıaǵnı bul balalar Qazaqstan azamattarynan týǵan balalar, Qazaqstan Respýblıkasynyń azamattary ekendigine kózimiz jetkende ǵana alyp kelip otyrdyq», deıdi «Jýsan» operasııasy týraly Egemen Qazaqstan» gazetine pikir bildirgen Erjan Ashyqbaev.