Qazaqstanda bilim berý granttaryn taǵaıyndaý konkýrsyna qatysý úshin qujattar qabyldaý 16 shilde kúni bastalady. Pandemııa jaǵdaıyna baılanysty qujat qabyldaý elektrondy formatta júzege asyrylady.
Bilim jáne ǵylym mınıstrliginiń habarlaýynsha, oqýǵa túsýshiler 6 mamyr men 1 shilde aralyǵynda ótken UBT-nyń eki nátıjesiniń bireýin konkýrsqa usyna alady. О́tinish bergen kezde talapkerler attestat, attestatqa qosymshanyń elektrondy kóshirmelerin jáne elektrondy túrde kólemi 3h4 fotosýretti, sondaı-aq basqa da qujattyń kóshirmelerin qosa tapsyrýy qajet.
Eger talapker «Altyn belgi» ıegeri nemese otansúıgishtik jáne belsendi azamattyq ustanymy úshin erekshelik bel-gisimen marapattalǵan bolsa, onda ol basqa úmitkerlermen baldary teń bolǵan jaǵdaıda basym quqyqqa ıe bolady. Olımpıadalar men sporttyq jarystardyń jeńimpazdary úshin de osyndaı artyqshylyqtar qarastyrylǵan. Talapkerlerdiń mundaı jetistikteriniń eskerilýi úshin qujattardy tapsyrý kezinde rastaıtyn qujattardyń kóshirmelerin tirkeý qajet. Shet tilin meńgergenin rastaıtyn halyqaralyq sertıfıkat bolǵan kezde ótinish berýshi sertıfıkattyń ataýyn, balyn kórsetedi jáne elektrondy sertıfıkatty tirkeıdi.
Sonymen qatar bıyl bilim berý granttaryn bólý kezinde Bilim jáne ǵylym mınıstrligi alǵash ret halyqtyń áleýmettik osal toptaryna kvotalar bóldi. Endi kópbalaly nemese tolyq emes otbasylardan shyqqan balalar, sondaı-aq erekshe qajettilikteri bar balalardy tárbıelep otyrǵan otbasylardaǵy talapkerlerdiń grant alý múmkindikteri joǵarylaı tústi.
Kámeletke tolmaǵan tórt jáne odan kópbala tárbıelep otyrǵan otbasylardaǵy balalar úshin granttardyń jalpy sanynyń 5%-y, keminde úsh jyl tolyq emes otbasy mártebesi bar otbasylardan shyqqan balalarǵa 1%-y, I, II toptaǵy múgedek balalardy tárbıelep otyrǵan otbasylardan shyqqan túlekterge bilim berý granttarynyń 1%-y qarastyrylǵan.
UBT qorytyndysy boıynsha keminde 65 ball jınaǵan talapkerler Ulttyq joǵary oqý oryndaryna túse alady. «Pedagogıkalyq ǵylymdar» – keminde 75 ball, «Densaýlyq saqtaý» − keminde 70 ball, «Aýyl sharýashylyǵy jáne bıoresýrstar», «Veterınarııa» – keminde 60 ball, basqa joǵary oqý oryndaryna – keminde 50 ball. Bul rette UBT-nyń árbir páni nemese shyǵarmashylyq emtıhan boıynsha keminde 5 ball jınaý qajet.
Talapkerler men olardyń ata-analarynyń densaýlyǵyn qorǵaý maqsatynda joǵary oqý oryndarynda vırtýaldyq qabyldaý komıssııalary jumys istep, talapkerlerge beıne baılanys arqyly keńes beredi. Bul ári qujat qabyldaý prosesin de jedeldetedi.