Bıyl qańtar aıynda eldegi turǵyn úı baǵasy kenet qymbattaǵan edi. Mundaı joǵary ósim áý basta zeınetaqy qoryndaǵy aqshasyn paıdalanatyndar esebinen bolǵan. Qazir qordaǵy artyq aqshasyn kóbi alyp aldy. Endi jurttyń kókeıindegi bir suraq: úı arzandaı ma? Bul saýalǵa jaqynda Indýstrııa jáne ınfraqurylymdyq damý birinshi vıse-mınıstri Qaıyrbek О́skenbaev naqty jaýap berdi.
Úkimettiń keńeıtilgen otyrysynda Prezıdent Qasym-Jomart Toqaev qurylys materıaldary men jyljymaıtyn múlik naryǵy baǵasynyń ósýin tejeý jónindegi keshendi sharalar legin qabyldaýǵa tapsyrma bergeni belgili. Osyǵan baılanysty mınıstrlik birqatar aýqymdy jumystardy qolǵa alypty. Birinshi vıse-mınıstrdiń aıtýynsha, vedomstvo baspana baǵasyna únemi monıtorıng júrgizip otyr. «Bıylǵy qańtar aıynda jyljymaıtyn múlik naryǵy kenet qymbattap, jańa úılerdiń baǵasy respýblıka boıynsha birden 3,8%-ǵa kóterildi. Al naryqtaǵy baǵa 7,2%-ǵa sharyqtady. Maýsym aıyndaǵy monıtorıng boıynsha eski úılerdiń baǵasy 1,2%-ǵa artsa, jańa páterlerdiń quny 0,9% ósti», dedi mınıstr Ortalyq kommýnıkasııalar qyzmeti alańynda ótken brıfıngte.
Elimiz boıynsha, ásirese Petropavl qalasynda úı qatty qymbattaǵan. Munda qańtar-aqpan aılarynda úıdiń naryqtaǵy baǵasy 5,6%-ǵa deıin ósip, sáýir aıynda 2,4%-ǵa tómendegen.
Q.О́skenbaevtyń aıtýynsha, jyl basynda turǵyn úı naryǵynyń qymbattaýy zeınetaqy qoryndaǵy aqshany paıdalanýǵa baılanysty boldy. Qazir baǵa turaqtalyp keledi. «Meniń jeke boljamym boıynsha kúzge qaraı turǵyn úı baǵasy arzandaı bastaıdy», dedi ol.
Memleket basshysynyń tapsyrmasynan keıin qazir qurylys materıaldary men baspana baǵasyn tejeý boıynsha seń qozǵalyp jatqany anyq. Tipti óndirýshi men qurylys salýshy arasynda tikeleı kelisim jasaý arqyly baǵany arzandatý máselesi «Atameken» ulttyq kásipkerler palatasyna júkteldi.
Negizi bul sheshimder baspana baǵasy qymbattamaı turyp qabyldanýy kerek edi. О́kinishke qaraı, bizde másele ábden ýshyqqannan keıin ǵana seń qozǵalady. Endi bir kóterilgen baǵanyń qaıta túsýi ekitalaı...