Tehnologııanyń qaryshtap damyǵany bul. Jýyqta elektrondy dúken О́skemendegi OV-156/1 túzeý mekemesine ornatyldy. Endi aıyptalýshylardyń nemese sottalýshylardyń alysta turatyn týystary munda kelip áýre bolmaıdy, dep habarlaıdy Egemen.kz.
Túzeý mekemesine jańadan ornatylǵan elektrondy dúken arqyly sottalǵan nemese aıyptalǵan azamattar ózderi tańdaǵan azyq-túlikterin, kerek-jaraqtaryn tapsyrys berip alǵyza alady. Árıne, tizimde ruqsat etilgen zattar ǵana bar.
– Olar týystarynyń nómirin tirkep, dúkenmen esep aıyrysa beredi. Úsh nómirge deıin tirkeýge bolady. Qajetti taýarlaryn tańdaǵan soń óz JSN-yn engizip, qupııa sózderin jazady. Ár zattyń buryshynda baǵasy, salmaǵy kórsetilip tur. 20 kelige deıin tapsyrys berýge ruqsat, – deıdi tártip jáne kúzet bóliminiń bastyǵy, ádilet maıory Erbolat Samarqanov.
Elektrondy dúken ýaqytsha ustaý ızolıatoryna qoıyla sala úsh adam tapsyrys berip, keregin aldy. Aıta ketsek, tapsyrys tórt kún ishinde keledi eken. Kelgen zattardy baqylaýshylar tekserip baryp, ishke ótkizedi.
– Týǵan-týystar alystan taksı alyp, munda kelgenshe, osy jerden ózim-aq keregimdi ala beremin. О́te yńǵaıly deıdi, – aıyptalýshy K.Mının.
Aıtqandaı, mundaı elektrondy dúkender basqa da túzeý mekemelerine ornatylyp jatqan kórinedi.