Qostanaı aýdanyna qarasty Altyn Dala aýylynda osydan bir aı buryn ǵana jóndeýden ótken kóshe apatty jaǵdaıda tur. Byltyr bul eldi mekenge ortalyqtandyrylǵan sý qubyry tartylyp, bıyl kósheleri asfalttalǵan, dep habarlaıdy Egemen.kz.
Alaıda taqtaıdaı túzý kósheniń eki jıegine jabylǵan borpyldaq topyraqty jańbyr sýy opyryp shaıyp ketip, jańa asfalttyń astyn uńǵı bastaǵan. Endi bir qatty jańbyr uryp ótse, kósheniń kóship ketetin túri bar.
Qazirdiń ózinde yrsıyp, asfalty ajyraı bastaǵan Abaı kóshesiniń shetindegi qudyqtardyń mańaıynda tereń shuńqyrlar paıda bola bastady. Kólik pen adam túsip ketpeý úshin turǵyndar onyń ústine shybyq qadap, kólik dońǵalaǵymen jaýyp qoıǵan.
Sapasyz jóndelgen joldyń eki jaǵyn qaıta kómip, ony jańbyr sýy shaıyp ketpeıtindeı etip durystap nyǵyzdaý týraly aıtqan aýyl turǵyndary jergilikti ákimnen áli jaýap ala almaı otyr.
Biz Qostanaı aýdany ákiminiń orynbasary Nazarbek Qońqabaevqa qońyraý shalyp edik, «Bul jaıdan habardarmyz. Kósheniń bir-aq jerin ǵana jańbyr shaıyp ketti. Bul túk etpeıdi. Jóndeý jumystaryn «Van» JShS-i júrgizgen. 2 jyldyq kepildik merzimi bar. Biz merdigerge joldy qaıta durystaý jóninde talap hat jibergenbiz. Qazir jaýabyn kútip otyrmyz. Merdiger ózi jibergen olqylyqtyń ornyn toltyrýdan bas tartsa, sotqa beremiz» degen jaýap aldyq.
Altyn Daladaǵy jol jóndeý jumystaryna 30 mln teńge bólingen. Kósheniń qazirgi jaı-kúıin turǵyndardyń biri smartfonǵa túsirip alypty.
«Osy asfaltqa memleket qomaqty qarjy jumsady. Erteń joldy sý shaıyp ketse, sol qyrýar qarjy, eren eńbek zaıa ketedi ǵoı!», deıdi keıigen turǵyn.
Qostanaı oblysy