Aýyl bolashaǵy jaqsylyqqa uıytqy bola biletin, halqyn ilkimdi isterge bastap, baıandy sharýaǵa baǵyttaıtyn aýyldyq okrýg ákimderine baılanysty ekendigi álimsaqtan belgili. Sondyqtan da jurttyń aqjarylqap kúnnen úmiti zor.
Mánshúk aýyly – etek-jeńi keń pishilgen eldi meken. Aýyl sharýashylyǵyna arnalǵan 25868 gektar jer bar, 12 ujymdyq sharýashylyq jumys isteıdi. Bir seriktestik pen 5 jeke kásipker aýyldastaryna jumys taýyp berip, nápaqalaryn aıyryp otyr. Aýyldaǵy 955 turǵynnyń 455-i daýys bermek.
Aýyl ákimi bolyp saılanýdan aýyldyq okrýgtiń burynǵy ákimi Ǵanı Isaev úmitti. Aýyl ákimi bolyp turǵan kezinde birshama sharýanyń basyn qaıyrypty. Jas mamandarǵa arnalǵan bes páterlik jataqhana, balabaqsha, aýyl klýby men mektebin jylýmen qamtamasyz etetin qazandyq salynǵan. Aýyl mektebi kúrdeli jóndeýden ótkizilgen. Turǵyndar qazir jasandy jamylǵy jabylǵan fýtbol alańy men keń de jaryq dámhananyń ıgiligin kórip júr.
Parlament Májilisiniń depýtaty, Nur Otan partııasy depýtattyq fraksııasynyń múshesi Mádı Elýbaev aýyl ákimine úmitkermen kezdesip, birneshe áleýmettik-turmystyq nysandy birge aralap kórdi. Jergilikti ákimdi saılaýǵa baılanysty uıymdastyrylǵan jıynǵa qatysyp, saıası naýqannyń mán-mańyzyn túsindirip berdi.
Kezdesý barysynda aýyldaǵy shaǵyn jáne orta kásipkerlikti damytý máseleleri egjeı-tegjeıli sóz boldy. Májilis depýtaty aldaǵy saılaýdyń máni týraly aýyl turǵyndaryna taratyp aıta kelip, Nur Otan partııasynyń eldiń áleýmettik jaǵdaıynyń jaqsarýyna aıanbaı atsalysyp jatqandyǵyna toqtaldy. Ásirese el ekonomıkasynyń damýyna aıryqsha kóńil bólinip otyr. Jańa jumys oryndaryn ashý, jumysshylardyń eńbekaqylarynyń tolymdy bolýy, básekege qabiletti otandyq ónimdi kóbeıtý, jańa óndiris oryndaryn ashý máseleleri – partııa alǵa qoıǵan mindetter. Jetekshi partııanyń demeýimen árkimniń múmkindigine oraı aldynan aq jol ashylyp, keńistigi keńeıetindigi tilge tıek etildi. Sodan keıin aýyl ákimdiginen úmitker Ǵanı Qýantaıuly saılaýaldy baǵdarlamasymen tanystyrdy.
Aýyl turǵyndary óz tańdaýyn jasaýǵa yqylasty. Olar týyp-ósken eldi mekenderiniń aldaǵy taǵdyryn kimge senip tapsyratynyn endi ózderi sheshetindigine qýanyshty.
Aqmola oblysy,
Selınograd aýdany