Nábı Qaıyrdy 2007 jyldyń 27 sáýirinde dúnıege kelgen. Kishkentaıynan sportqa jany jaqyn, ásirese fýtbol dese ishken asyn jerge qoıatyn Nábı 6 jasynda fýtbol seksııasyna bardy.
Naqty aıtqanda, baldyrǵandy atasy, jazýshy-jýrnalıst Qaıyrdy Nazyrbaev astanadaǵy №8 balalar men jasóspirimder sport mektebiniń fýtbol seksııasyna jazdyrǵan edi. Erinbeı, jalyqpaı talaby taýdaı nemeresin jattyǵýǵa aparyp júrdi. Nábıdiń ákesi Arman da balasynyń fýtbolǵa degen qushtarlyǵyn baıqap, qajetti qural-jabdyqtardy, oqýlyqtardy áperip turdy.
Nábı Almaty, Shymkent, Zerendidegi fýtbol týrnırlerine qatysyp, tájirıbesin shyńdaı tústi. Qarsylastar qaqpasyna birneshe ret dop soqqanda otbasy músheleri erekshe qýandy.
Arman qyzmet babymen 2019 jyly Kıev qalasyna qonys aýdardy. 12 jastaǵy Nábı qarap otyrsyn ba, bastapqyda aýla klýbtarynda baǵyn synady. Tájirıbesi tolysqan talapty óspirim «Dınamo» komandasyna qabyldandy. Munda negizinen 16 jasqa deıingi balalar dop tebetin.
2019 jyldyń jazynda Arman Qaıyrdyulynyń otbasy Horvatııaǵa qonys aýdardy. Nábı ol jaqqa barǵan soń jergilikti «RNK Splıt» klýbyna qabyldandy. Klýb bıyldyń ózinde Dalmatinko cup týrnırinde shırek fınalǵa deıin jetse, taǵy bir týrnırde ekinshi orynǵa ıe boldy. Bul jetistikte qazaqstandyq jas fýtbolshy, bolashaǵynan úmit kúttiretin Nábı Qaıyrdynyń da mol úlesi bar.
Fýtboldan Qazaqstannyń esesi ketip, eńsemizdiń túsip júrgeni kópshilikke belgili. Nábı sııaqty talantty jastardy óse kele el namysyn qorǵaýǵa shaqyrsaq, utarymyz anyq.
– Nábıdiń eline degen yqylasy erekshe. Onyń armany Qazaqstannyń fýtbolyn álemdik dárejege jetkizýge úles qosý, – deıdi bizben áńgimesinde Qaıyrdy Nazyrbaev.
Ońdasyn ELÝBAI,
Qazaqstannyń qurmetti sport qaıratkeri
О́SKEMEN