Qazaqstan Respýblıkasynyń Bilim jáne ǵylym mınıstri 2021 jylǵy 27 shildedegi «Orta bilim berý uıymdarynda 2021 - 2022 oqý jylynyń bastalýyn, uzaqtyǵy men kanıkýl kezeńderin aıqyndaý týraly» buıryqqa qol qoıdy, dep habarlaıdy Egemen.kz.
«Menshik nysanyna jáne vedomstvolyq baǵynystylyǵyna qaramastan orta bilim berý uıymdarynda 2021- 2022 oqý jylynyń bastalýy, uzaqtyǵy jáne kanıkýly kezeńderiniń mynadaı merzimderi aıqyndalsyn», dep jazylǵan qujatta.
- 2021-2022 oqý jylynyń bastalýy – 2021 jylǵy 1 qyrkúıek;
- oqý jylynyń uzaqtyǵy 1-synyptarda – 33 oqý aptasy, 2-11 (12)- synyptarda – 34 oqý aptasy.
Meıram kúnderine túsken sabaqtar oqý baǵdarlamasy mazmunynyń kiriktirilýi eskerile otyryp, qaıtalaýǵa arnalǵan saǵattar esebinen kelesi jumys kúnderine aýystyrylady.
Oqý jyly ishindegi 1-11 (12)-synypqa arnalǵan kanıkýl kezeńderi:
kúzgi kanıkýl – 7 kún (2021 jylǵy 25-31 qazan aralyǵynda), qysqy – 11 kún (2021 jylǵy 31 jeltoqsan men 2022 jylǵy 10 qańtar aralyǵynda), kóktemgi – 11 kún (2022 jylǵy 21-31 naýryz aralyǵynda);1-synypta qosymsha kanıkýl – 7 kún (2022 jylǵy 7-13 aqpan aralyǵynda).
Buıryq 9 tamyzdan bastap kúshine enedi.