Azyq-túlik qaýipsizdigin nyǵaıtý – ortaq másele

Mysyr Arab Respýblıkasynyń (MAR) Sý resýrstary jáne ırrıgasııa mınıstri Mohammad Ábdel-Atımen bolǵan kelissózderde taraptar Mysyr men Azyq-túlik qaýip­sizdigi jónindegi ıslam uıy­my­nyń yntymaqtastyǵynyń qazir­gi jaǵdaıy men damý perspektıva­laryn qarastyrdy. Aýyl sha­rýa­­shylyǵynda sý resýrstaryn bas­qarý máselelerine erekshe nazar aýdaryldy. Taraptar aqparat almasýdy jedeldetý úshin ortalyqtardy taǵaıyndaýǵa jáne uıymǵa múshe elderdiń aýyl sharýashylyǵynda sý sharýashylyǵyn jetildirý boıynsha is-sharalar josparyn ázirleýge kelisti. Pandemııany eskere otyryp, IYU sheńberinde Global Drylands Allience, ICARDA, ICBA sııaqty sý resýrstaryna qatys­ty barlyq ınstıtýttarmen yn­tymaq­tastyqty jandandyrý týraly pikir aıtyldy. Mysyrlyq mınıstr AQIU basshysyn 2021 jyldyń 24-28 qazanynda ótetin Kaırdegi sý aptalyǵyna qatysýǵa shaqyrdy. Shaqyrý qabyldandy.

Sonymen qatar, Mysyr Arab Respýblıkasy Azyq-túlik qaýip­sizdigi ulttyq agenttiginiń tóraǵasy, doktor Hýseın Mansýrmen jáne BUU Azyq-túlik jáne aýyl sha­rýa­shylyǵy uıymy (FAO) Bas dırektorynyń orynbasarymen jáne FAO-nyń Taıaý Shyǵys jáne Soltústik Afrıka aımaqtyq ókili, doktor Abdýl Hakım Ál-Vaermen Kaır keńsesinde ZOOM formatynda konferensııa ótti.

Qurǵaq aımaqtardaǵy aýyl­sha­rýashylyq zertteýleriniń halyq­aralyq ortalyǵynyń (ICARDA) Bas dırektory Álı Abýsaba­men kezdesýde Azyq-túlik qaýip­siz­digi jónindegi ıslam uıymy­men ózara túsinistik týraly me­mo­ran­dýmǵa jáne jaqyn bola­shaqqa arnalǵan is-sharalar josparyna qol qoıyldy.

Aýyl sharýashylyǵy jáne melıorasııa mınıstri Ál-Saıed Ál-Kýseırmen kezdesý barysynda ǵy­­ly­mı zertteýlerge, tehnologııa­lar men ınnovasııalarǵa qatysty baǵdarlamalarǵa basa nazar aýdarylyp, yntymaqtastyqtyń bir­qatar ózekti taqyryptary tal­qylan­dy. Sý resýrstaryn bas­qarý jáne ósimdik zııankesteri men janýarlar aýrýlarynyń trans­shekaralyq taralýyna baılanysty tótenshe jaǵdaılardyń aldyn alý, sondaı-aq Mysyr tarapynyń 2021 jyldyń 8-9 qyrkúıeginde Nur-Sultanda ótetin Azyq-túlik qaýipsizdigi jónindegi ıslam uıymy Bas Assambleıasynyń IV sessııasyna qatysýyna erekshe nazar aýdaryldy.

Sol kúni Mysyr Arab Respýb­lıkasy Syrtqy ister mınıstriniń kópjaqty yntymaqtastyq jáne halyqaralyq qaýipsizdik jónindegi orynbasary Ihab Badavımen kezdesý ótkizildi, onyń barysynda Mysyr tarapynyń AQIU-men odan ári jan-jaqty yntymaqtastyqqa beıimdiligi baıqaldy.

Bas dırektor E.Baıdáýlettiń sapary Mysyr men Azyq-túlik qaýipsizdigi jónindegi ıslam uıy­mynyń pozısııasy kóp­te­gen má­selelerge sáıkes keleti­nin kórset­ti. Jergilikti BAQ kelissóz­der­diń nátıjelerine oń baǵa berdi. AQIU basshysy Taıaý Shyǵystaǵy eń iri Nile TV International tele­arnasynyń prezıdenti, kezinde Mysyr Arab Respýblıkasy Ulttyq medıa agenttigi tóraǵasynyń orynbasary qyzmetin atqarǵan, doktor Tagrıd Hýseınge 20 mınýttyq suhbat berdi.