Magıstratýraǵa bilim granttaryn taǵaıyndaý konkýrsyna qatysý úshin qujattardy qabyldaý bastaldy. Ol 14 tamyzǵa deıin joǵary oqý oryndarynyń vırtýaldyq qabyldaý komıssııalary arqyly júzege asyrylady, dep habarlaıdy Egemen.kz.
Bul týraly BǴM málimdedi. Magıstratýrada oqýǵa arnalǵan bilim berý granttary keshendi testileý nátıjeleri boıynsha konkýrstyq negizde beriledi. Keshendi testileýge barlyǵy 36 965 adam qatysty.
«Qujattardy tapsyrý kezinde oqýǵa túsýshi bilim berý baǵdarlamalarynyń bir tobyn jáne úsh joǵary oqý ornyn kórsetedi. Magıstratýraǵa bilim berý grantyn taǵaıyndaý konkýrsy 16-20 tamyz aralyǵynda ótedi. Jalpy 2021-2022 oqý jylyna magıstratýra boıynsha 13 myńnan astam grant bólindi. Granttardyń eń kóp sany pedagogıkalyq mamandyqtar úshin qarastyrylǵan – 3642. Injenerlik, óńdeý jáne qurylys salalaryna 3429 grant, jaratylystaný ǵylymdary, matematıka jáne statıstıka – 1278, aqparattyq-kommýnıkasııalyq tehnologııalar – 1233, aýyl sharýashylyǵy men bıoresýrstar – 527 grant bólindi»,dedi QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Esterińizge sala keteıik, bilim berý granttary QR Eńbek jáne halyqty áleýmettik qorǵaý mınıstrliginiń, sondaı-aq jumys berýshilerdiń kadrlarǵa qajettiligi boıynsha derekteri negizinde bólingen.
Bilim granty ıegerleriniń tizimi Ulttyq testileý ortalyǵynyń saıtynda jarııalanady.