Almaty oblysyndaǵy jóndeý jumystary bitpegen bilim uıalarynyń oqýshylary ákimdik ǵımaraty men mádenıet úılerinde oqıtyn bolydy, dep jazady Egemen.kz QazAqparatqa silteme jasap.
Búginde Almaty oblysynda 19 mektepke kúrdeli jóndeý jumystary júrgizilip jatyr. Onyń 9-y bıylǵy oqý jylyna deıin tapsyrylmaıdy.
Bıylǵy jańa oqý jylynda ashylmaıtyn mektepterdiń biri Taldyqorǵan qalasyndaǵy Ostrovskıı atyndaǵy mektep. Bul bilim ordasynda kúrdeli jóndeý jumystar maýsym aıynda ǵana bastalǵan. Mekteptiń tórt qabyrǵasy túgeldeı qyrylyp, qyzyl kirpish kúıinde tur. Edenderin de túgel alyp tastaǵan. Aımaqtaǵy Bilim basqarmasynyń aıtýynsha, jumystar jyl sońyna deıin aıaqtalady. Sondyqtan atalǵan mektepte oqyp júrgen 1149 bala kúzde qaladaǵy ózge mektepterde oqıdy.
Keıbiri tipti kolledj ǵımaratynda oqıtyn bolady.
«Mektepaldy daıarlyq toptary jáne birinshi synyp oqýshylary qaladaǵy gýmanıtarlyq-tehnıkalyq kolledj ǵımaratynda bilim alady. Sol jerden kabınetter bólip otyr. 9 mektepte kúrdeli jóndeý kesh bastalýy jáne oǵan qarjynyń kesh bólinýi jaǵdaıdy qıyndatty. Sondyqtan oqýshylarǵa qolaıly jaǵdaı jasalyp, mektep bitkenge deıin qaı ǵımaratta oqysa sol jerge jıhazdar qoıylyp, oqý prosessi úzdiksiz ótedi dep josparlap otyrmyz», dedi Almaty oblystyq Bilim basqarmasy basshysynyń orynbasary Aıjan Adambekova.
Sondaı-aq Aqsý aýdanynyń Saǵabúıen aýylyndaǵy Toqtarov atyndaǵy mektepte de jóndeý jumystary endi qyzǵan. Aldaǵy oqý jylynda bul mekteptiń 172 oqýshysy aýyldyq ákimdiktiń ǵımaratynda bilim almaq.
Al, Panfılov aýdanynyń Sarybel aýylyndaǵy Kobıkova atyndaǵy mekteptiń 286 oqýshysyn atalǵan aýyldyń mádenıet úıinde oqytý josparlanyp otyr.
Sondaı-aq Raıymbek aýdanynyń Tuzkól aýylyndaǵy Musaqulov atyndaǵy mekteptiń 87 oqýshysy osy aýyldyń ákimshilik ǵımaratynda bilim alady.