Qazaqstanda Prezıdenttik jastar kadr rezervine kandıdattardy irikteýdiń ekinshi kezeńi bastalady, dep habarlaıdy Egemen.kz.
«Prezıdent janyndaǵy jastar kadr rezevriniń ulttyq komıssııasy ekinshi kezeńdi ótkizý, rezervterdi irikteý men onyń josparyn bekitti. Rezervterdi irikteý aldaǵy 1 qyrkúıekte bastalady. Sonyń nátıjesinde memlekettik sektor úshin 50 jas rezerv tańdap alynady», dedi QR Memlekettik qyzmet isteri agenttiginiń tóraǵasy Anar Jaıylǵanova OKQ-de onlaın ótken baspasóz máslıhatynda.
Sondaı-aq, agentttik basshysy kandıdattarǵa qoıylatyn negizgi talaptarmen tanystyrdy.
«Kandıdattarǵa qoıylatyn negizgi talaptar sol burynǵysynsha, Qazaqstan Respýblıkasynyń azamaty bolýy tıis, jasy 35-ten aspaýy kerek, joǵary bilimi bar jáne eńbek ótili 5 jyldan kem bolmaýy qajet. Osy jolǵy jastar rezevterinen bilim men daǵdydan bólek, qoǵamdaǵy máselelerden habardar bolyp, ony sheshýge qyzyǵýshylyq tanytýy joǵary baǵalanady. Sonymen qatar arnaıy tapsyrmalar berilip, kandıdattardyń bilim-biligi jańasha baǵalanady. Irikteý kezeńine Memleket basshysy buǵan deıin saıası, memlekettik qyzmet, ákimshilik korpýs qyzmetine taǵaıyndaǵan qyzmetshiler qatysa almaıdy. Prezıdenttik jastar kadr rezevrinde buryn bolǵan azamattardyń qatysýyna bolmaıdy», deıdi ol.
Onyń aıtýynsha, irikteýden ótkender Prezıdenttik jastar kadr rezervinde 3 jylǵa deıin bola alady.
«Irikteýden ótken mamandar memlekettik qyzmetke zań aıasynda saılanyp, taǵaıyndalatyn bolady. Eger kez kelgen memlekettik qyzmetke jastar kadr rezervinde joq mamannyń kandıtatýrasy kelip tursa, ol qyzmetke jastar kadr rezervindegi mamandy taǵaıyndaý mindetti emes», dedi A. Jaıylǵanova.