2021 jyldyń 15-17 qyrkúıek aralyǵynda XVII Eýrazııalyq medıaforýmy ótedi. Jıynǵa qazaqstandyq jáne álemdik jetekshi BAQ ókilderi, halyqaralyq sarapshylar, saıasatkerler, ǵalymdar, qoǵam jáne mádenıet qaıratkerleri qatysady, dep habarlaıdy Egemen.kz.
Eýrazııalyq medıaforým aıasynda álemdik saıasat pen ekonomıka, BAQ, ekologııa, bilim jáne fýtýrologııa sııaqty salalardy qamtıdy. Tanymal halyqaralyq jáne qazaqstandyq sarapshylar pandemııanyń jahandyq úderisteri men adamı qarym-qatynasqa áserin, medıa men tehnologııa salasyndaǵy tendensııalardy, naqtylanbaǵan aqparattyń kóbeıý problemasyn, búgingi ekologııalyq kún tártibin, sondaı-aq, bolashaq álemniń kelbetin talqylaıtyn bolady.
«Sońǵy 2 jyl kúrdeli máselelerdi talqylaý jáne ony sheshý jolyn izdeýde birige otyryp áreket etý adamzat úshin mańyzdy ekenin kórsetti. Aldaǵy forým pandemııa kezinde álemdik qaýymdastyq úshin mańyzy artqan máselelerdi kóterip, qaısysyna erekshe nazar aýdarý kerektigin anyqtaýǵa jáne ári qaraı ne isteý kerektigin túsinýge arnalǵan. Osyǵan oraı, forýmdy ótkizýge qoldaý kórsetken seriktestterimizge alǵysymyzdy bildiremiz», dedi EAMF bas dırektory Almagúl Ahmetjanova.
Eýrazııalyq medıaforým úsh kún qatarynan onlaın formatta ótkizilmek.
Birinshi kún álemge tanymal sarapshylardyń praktıkalyq sheberlik sabaqtaryna arnalady. Sondaı-aq, forýmnyń birinshi kúni aıasynda dástúrli dóńgelek ústel uıymdastyrylady. Jıynda «Túrkitildes elderdiń BAQ-y. Qazirgideı jaǵdaıda yntymaqtastyqty damytý» taqyryby aıasyndaǵy máseleler talqylanbaq.
Ekinshi kúnniń qatysýshylaryn 4 sessııa kútedi, onyń ishinde:
«Qazaqstan Táýelsizdiginiń 30 jyldyǵyna arnalǵan sessııa»; «Pandemııa álemdi qalaı ózgertti jáne jahandyq ómir súrýdiń jańa baǵyttaryn qalaı anyqtady?!»; «Aqparat kóp - shyndyq az»; «Jasyl strategııa. Taǵy bir sońǵy múmkindik» taqyryptary qamtylǵan.Úshinshi kún josparyndaǵy jıyndarda da mańyzdy máseleler nazarǵa alynatyn bolady:
«Ashýshańdyq dáýiri. Álemdi bılep turǵan kim?»; «Medıa jáne tehnologııalar. 2021 trendteri»; «Eńbek naryǵynyń bolashaǵy jáne bilim»; «Oryndalǵan keleshek álemi» taqyryptary boıynsha jıyndar ótkiziledi.