Buǵan deıin fýtboldan áıelder arasyndaǵy ulttyq quramanyń eks-kapıtany Halıda Popal sport uıymdaryna júginip, sportshylardyń qaýipsizdigin qamtamasyz etýdi suraǵan, dep jazady Egemen.kz.
VVS taratqan málimet boıynsha, Halyqaralyq fýtbol qaýymdastyqtary federasııasy (FIFA) birneshe eldiń úkimetine fýtbolshylardy Aýǵanstannan shuǵyl túrde shyǵarý týraly hat joldady.
Halyqaralyq kásibı fýtbolshylar qaýymdastyǵy federasııasy (FIFPro) da aýǵan sportshylaryna kómektesýge shaqyrdy.
«Sońǵy birneshe kúnde FIFPro Aýǵanstandaǵy sportshylardy evakýasııalaý josparyn ázirleý úshin birneshe eldiń úkimetimen baılanysta boldy. Bul qutqarý mıssııasynyń maqsaty – kóptegen adamnyń qaýipsizdigin saqtaý», dep jazǵan qaýymdastyq Twitter-de.
FIFPro sonymen qatar jas aýǵan fýtbolshysy, 16 jasqa deıingi ulttyq quramanyń burynǵy oıynshysy Zakı Anvarıdiń Kabýl áýejaıynda qaıtys bolýyna baılanysty kóńil aıtty. Ol Aýǵanstannan qashyp bara jatyp, ushaqtyń dóńgeleginde ottegi jetispeýshiliginen kóz jumdy.
Buǵan deıin fýtboldan áıelder arasyndaǵy ulttyq quramanyń eks-kapıtany Halıda Popal sport uıymdarynan sportshylardyń qaýipsizdigin qamtamasyz etýdi ótingen. Ol Talıban bıliginde qalǵan adamdardyń taǵdyry úshin alańdaıtynyn bildirdi.
«Men Aýǵanstandaǵy fýtbolshylardan túrli habarlama alamyn. Olar qaraýsyz qalǵandaryn, úıinen shyǵa almaıtynyn, qorqatynyn aıtady. Bul qorqynyshty tús sııaqty. Biz áıelder men qyzdardy batyl bolýǵa, áleýmettik jelilerin jabýǵa shaqyramyz. О́te aýyr. Biz áıelderdiń quqyǵyn qatty qorǵadyq, biraq qazir olardyń ómirine úlken qaýip tónip tur», dedi Halıda Popal.
Tálipter bılik basyna kelgeli áıelderdiń «sharıǵat zańyna sáıkes» jumys isteı alatynyn málimdegen.