Atyraý jurtshylyǵy Tokıo Paralımpıadasynyń kúmis júldegerlerin kútip aldy, dep habarlaıdy Egemen.kz.
Búgin, 31 tamyzda Atyraýǵa Tokıodaǵy Paralımpıada oıyndarynda dzıýdodan kúmis júldeni ıelengen Ánýar Sarıev, Dáýlet Temirjan men Zarına Baıbatına ushyp keldi.
«Paralımpıadaǵa altyn medal alý úshin barǵan edim. Jeńiske jetý úshin bapkerimniń keńesin, ózimniń tájirıbemdi tolyq paıdalanýǵa tyrystym. Biraq, sál sáttilik jetispedi. Endi Parıjde Paralımpıadaǵa daıyndyqty bastaımyn. Sol kezde elimizdiń kók baıraǵyn jelbiretip, Ánuranyn shyrqatýǵa tyrysamyn», deıdi Paralımpıada oıyndarynyń kúmis júldegeri Ánýar Sarıev.
Paradzıýdodan el quramasynyń bas bapkeri Jandos Qııanovtyń aıtýynsha, barlyq sportshynyń medal alýǵa múmkindigi bolǵan. Al, Ánýar Sarıev – álemdik reıtıngte alǵashqy úshtikke engen tatamı sheberi.
«Sol sebepten, birinshi aınalymda Ánýardyń qarsylasy bolmady. Ekinshi kezeńde mońǵol sportshysyn jartylaı jeńispen utty. Sol kezdesýde azdaǵan jaraqat aldy. Murny synyp, saýsaǵyn aýyrtyp aldy. Soǵan qaramastan, kelesi aınalymda venesýelalyq Markos Blankomen kúresip, ony eki ádispen jeńdi. Al, fınalda ázerbaıjandyq Výgar Shırınlımen kezdesýde qatelik jiberip aldy. Qarsylasy sony paıdalanyp ketti», deıdi Jandos Qııanov.