Memleket basshysy Qasym-Jomart Toqaev QR Parlamenti palatalarynyń birlesken otyrysynda birqatar tapsyrma berdi, dep jazady Egemen.kz.
«Qazaqstan - áleýmettik memleket. Sondyqtan qıyn jaǵdaıǵa tap bolǵan azamattarǵa jan-jaqty kómek kórsetý - basty mindetterdiń biri. Alaıda qoǵamda áleýmettik masyldyq kórinisi beleń alýda. El ishinde áleýmettik baǵdarlamalardy ádeıi jeke múddesine paıdalanatyn azamattar az emes. Mundaı adamdar kez kelgen órkenıetti eldegi sııaqty zańnyń jáne búkil qoǵamnyń aldynda jaýap berýi kerek. Osy sııaqty jaǵdaılar «memleketten ala bersem» degen kózqaras qalyptastyrdy. Al kómekke shynymen muqtaj jandar, ókinishke qaraı, áleýmettik qoldaý sharalarynan tys qalyp jatyr. Árıne, bizdiń elimizdiń múmkindikteri zor, biraq onyń da shegi bar. Eń bastysy áleýmettik jeńildikke ıe bolsam degen orynsyz pıǵyl adamdy óz eńbegimen tabys tabý qabiletinen aıyrady. Mundaı jaǵymsyz ómir salty urpaq tárbıesine, qazirdiń ózinde keri áser ete bastady. Sondyqtan bizge túbegeıli ózgeris kerek. Zań da, qoǵam da, adamdardyń sana-sezimi de ózgerýge tıis. Daıyndalyp jatqan áleýmettik kodekste osyndaı máselelerge barynsha nazar aýdarý kerek», dedi Prezıdent.