Qyrkúıektiń alǵashqy kúni bilim oshaqtarynda kópten kútken alǵashqy qońyraý soǵylyp, oqýshylar altyn uıa – mektebine oraldy. Saǵyndyryp jetken bul Bilim kúniniń burynǵydan jóni bólek. О́ıtkeni ádettegideı araǵa úsh aı emes, bir jarym jyldaı ýaqyt salyp, ustazdar men oqýshylar qaýymy mektebinde qaıta qaýyshyp otyr.
Pandemııanyń kesirinen májbúr bolǵan qashyqtan oqytý bilim berý salasynyń berekesin qashyryp, oqýshylardyń bilim sapasyna aıtarlyqtaı teris yqpalyn tıgizgeni belgili. Sondyqtan saladaǵy olqylyqtardyń ornyn toltyrý úshin oqý ordasyndaǵy dástúrli oqytýǵa oralý osy jyldyń basty mindeti boldy. Bul rette bilim oshaqtarynyń indet oshaǵyna aınalmaýyna basa mán beriledi. Iаǵnı koronavırýs ınfeksııasynyń qaýpi seıilmegen qazirgi kezde bilim berý uıymdary úshin arnaıy sanıtarlyq talaptardy saqtaý jumystary uıymdastyryldy.
Sondaı-aq oflaın oqytýǵa oralǵan jańa oqý jylynda dástúrli oqýlyǵymyz – «Álippemizdiń» oralǵany basty jańalyq boldy. Oqyrmandardyń esinde bolsa, osydan bes jyl buryn bas basylymda «Álippe» neden jazyqty boldy?» atty maqala jaryqkórip, Egemen Qazaqstan gazeti atalǵan oqýlyqqa alǵash ret arasha túsken edi. Osylaısha, oqý baǵdarlamasynan shyǵyp qalǵan«Álippe» bıyldan bastap jańa úlgide 1-synyp oqýshylaryna tapsyryldy. Ult ustazy Ahmet Baıtursynulynyń ádistemesi negizinde ázirlengen bas kitap bilim sapasynyń kóterilýine bastaıdy dep úmittenemiz.