Aýǵanstanda áıelder óz quqyǵyn saqtaýdy talap etip, narazylyq bildirdi, dep habarlaıdy Egemen.kz.
Aýǵanstannyń Gerat qalasynda 70-ke jýyq áıel «Talıban» qozǵalysynyń jańa basshylyǵynan áıelder quqyǵyn saqtaýdy jáne keńeıtýdi talap etip, narazylyq aksııasyn ótkizdi. Bul týraly Daily Mail habarlady.
«Bilim, qaýipsizdik jáne jumys - bizdiń negizgi quqyǵymyz», dep urandady sherýshiler.
Talıbannyń alǵashqy bıligi kezinde áıelder men qyzdarǵa bilim alý men jumys isteýge tyıym salynǵan edi. Qoǵamdyq oryndarda býrka kııý mindetti boldy jáne áıelder erkeksiz úıden shyǵa almady.
«Biz óz quqyǵymyzdy suraýǵa keldik», dedi kóterilisshilerdiń biri Fereshta Taherı AFP aqparattyq agenttigine telefon arqyly.
«Býrka kııýge de daıynbyz, biraq biz áıelderdiń mektepke barǵanyn, jumys istegenin qalaımyz», dedi olar.
Gerat - Iran shekarasyna jaqyn ornalasqan ejelgi Jibek jolynyń qalasy. Ol konservatıvti ortalyqtarmen salystyrǵanda edáýir kosmopolıttik kózqarastaǵy qala boldy. Degenmen keıbir áıelder býrka kıetin.
О́tken aıda bılikti basyp alǵan tálipter jańa úkimettiń quramyn talqylap jatyr. Olar bılik adam quqyqtaryn saqtaıtynyn, áıelderge sharıǵat zańy sheńberinde jumys isteýge ruqsat beretinin málimdegen, biraq turǵyndardyń kópshiligi Aýǵanstannyń jańa ákimshiliginde áıelderge oryn bolatynyna kúmánmen qaraıdy.
«Úkimettiń quramynda bizdiń de bolǵymyz keledi. Eshqandaı úkimet áıeldersiz qurylmaıdy. Tálipterdiń bizben keńeskenin qalaımyz», dedi sherýshilerdiń biri.
«Dáriger, medbıke syndy áıelder jumysqa oralyp jatyr, biraq tálipter olardy qorqytqanyn aıtyp shaǵymdanady», dedi taǵy biri. Onyń aıtýynsha, tálipter olarǵa qaramaıdy, sóılespeıdi, tek ashýly túr tanytady.
Gerattaǵy kóterilisshiler narazylyqty jalǵastyratynyn málimdedi.
«Biz narazylyqty jalǵastyramyz. Gerattan bastadyq jáne jaqyn arada basqa provınsııalarǵa taratamyz», dedi Basıra Taherı.