3 qyrkúıek kúni «Rýhanı jańǵyrý» qazaqstandyq qoǵamdyq damý ınstıtýtynyń uıymdastyrýymen «Qazaqstan Respýblıkasy Prezıdentiniń Qazaqstan halqyna joldaýy: Sapaly bilim berý» taqyrybyndaǵy «Azamattyq alań» kezekti onlaın otyrysy ótkizildi, dep habarlaıdy Egemen.kz.
Memleket basshysy «Halyq birligi men júıeli reformalar - el órkendeýiniń berik negizi» atty Qazaqstan halqyna joldaǵan Joldaýynda elimizdiń bilim berý júıesinde birshama olqylyqtar bar ekenin sóz etip, tıisti tapsyrmalar berdi.
«Biz elimizde ómir boıy oqytý tujyrymdamasyn keshendi túrde alǵa tartyp kelemiz. Halyqtyń beıresmı bilimge tartylýy tómen deńgeıde ekendigi eshkimge qupııa emes. Shyn máninde, ata-analardyń bilimge degen salǵyrt kózqarasy balalarda da sondaı kózqarasty qalyptastyrady», dep sharany bastady «Rýhanı jańǵyrý» qazaqstandyq qoǵamdyq damý ınstıtýtynyń Basqarma tóraǵasy Asylbek Esenbaev.
Basqarma tóraǵasy bilim berý salasynda berilgen jańa tapsyrmalarǵa da toqtala ketti.
Memlekettik tapsyrma aıasynda «Rýhanı jańǵyrý» ınstıtýty bıyl «Azamattyq alań» otyrystaryn turaqty túrde ótkizýdi josparlaǵan.
«Memleket basshysy 1 qyrkúıektegi joldaýynda ǵylymdy damytýdyń mańyzdylyǵyn atap ótti. Berilgen tapsyrmaǵa sáıkes zań jobasynyń tujyrymdamasy da daıyndaldy. Ǵylymdy qarjylandyrý mehanızmderiniń negizdi jetilmeýi sekildi anyq kedergiler bar ekeni jasyryn emes. Budan ózge de birshama olqylyqtardyń ornyn toltyrý maqsatynda QR qoldanystaǵy 3 kodeksi men 6 zańyna tolyqtyrýlar men ózgerizter engizý kózdelgen», dep atap ótti QR BǴM Ǵylym komıteti tóraǵasynyń orynbasary Dýman Orynbekov.
Mektepke qadam basqan búldirshinder sanynyń artýy qýantarlyq jaǵdaı. Dese de, munyń sońynda úsh aýysymdy oqý úrdisi, oryn tapshylyǵy, «Y» synyby sekildi ózge de máseleler týyndaǵany alańdatady.
«Úsh aýysymmen oqıtyn mektepter bar. Bul másele bolashaqta óz kedergilerin keltirýi ábden múmkin. Megapolısterdegi mektepterdiń sapasy men aýdandyq, aýyldyq mektepterdiń sapasy birdeı bolýy da asa mańyzdy. Aýyldyq mekteptiń jabdyqtalýy qalalyq mektepten tómen bolsa, biz «jabaıy» mıgrasııany qalyptastyryp alamyz. Bul úsh aýysymdy mektep máselesiniń eshqashan sheshilmeıtindeı etedi. Sondyqtan osy mektep máselesine naqty júıelilik qajet», degen pikir bildirdi Nur-Sultan qalasy 90-gımnazııa dırektory Aıatjan Ahmetjanuly.