Jazýshy Stıven Kıngtiń «Sol» atty romany «Úzdik shetel ádebıeti» serııasymen alǵash ret qazaq tilinde jaryq kórdi. Bul shyǵarma – avtordyń «Folıant» baspasynan jaryq kórip otyrǵan ekinshi kitaby. Buǵan deıin baspa Stıven Kıngtiń «Jasyl mıl» kitabyn qazaq tiline aýdarǵan bolatyn.
«Qorqynysh koroli» atanǵan Kıng shyǵarmalary alǵashqy sóılemderimen-aq oqyrmandy baýrap alady. Psıhologııalyq trıller janrynda jazatyn qalamgerdiń sheberligi adam nanǵysyz sıýjetter jasaı alýynda dep bilemiz. Stıven Kıngtiń fentezı, mıstıka, trıller, detektıv, qorqynyshty oqıǵalar sııaqty túrli janrda jazǵan 300-ge jýyq áńgimesi men romany bar. «Sol» – Viking Press baspasy 1986 jyly alǵash ret basyp shyǵarǵan, qorqynysh pen úreı janrynda jazylǵan amerıkalyq jazýshynyń tanymal romany.
Shyǵarmada sana qabileti, birikken toptyń kúshi, balalyq shaqtaǵy oqıǵalardyń eresek ómirge áseri taqyryptary qozǵalady. Negizgi sıýjette Men shtatyndaǵy oıdan shyǵarylǵan Derrı qalashyǵynda jeti jasóspirim adamdardy óltirip, kez kelgen túrge ene alatyn jantúrshigerlik qubyjyqpen kúresedi. Arada jyldar ótip, jasóspirimder eseıedi. Biraq ótkenniń sumdyǵy qaıta oralyp, áldebir surapyl kúsh jeti dosty zulymdyqpen jańa aıqasqa kıliktiredi. Osylaısha, týyndydaǵy oqıǵa eki túrli ýaqyt aralyǵynda baıandalady, biri basty keıipkerlerdiń balalyq shaǵy bolsa, ekinshisi olardyń eresek ómirin baıandaıdy.
Kıng bul romandy 1981 jyly bastap, tórt jylyn arnaǵan. Ol kitap keıipkerleriniń is-áreketine óziniń balalyq shaǵynyń estelikterin negizdegen. Sondaı-aq avtor «Soldy» óziniń «tanymal qubyjyqtar serııasy» boıynsha emtıhanym dep sanady. «Sol» buǵan deıingi «Drakýla», «Frankenshteın», «Trollenberg qubyjyǵynyń» elementterin jınaǵan «ǵaryshtan kelgen» qorqynysh ispetti. Kitap jarııalanǵannan keıin bir jyl ishinde eki jarym mıllıon dana tırajben tarap ketti.
«Sol» romany Locus Award jáne World Fantasy Award syılyǵyna usynylǵan. Týyndy Rolling Stone jýrnalynyń tańdaýy boıynsha Kıngtiń úzdik 10 týyndysynyń tizimine engizilgen, al BBC-diń 200 úzdik ádebıet tiziminde «Sol» 144-orynda. Al rejıssıor Tommı Lı Ýolles 1990 jyly roman sıýjeti boıynsha kishigirim serıal túsirdi. 2017 jyly argentınalyq rejısser Andres Mýskettı kitaptyń birinshi bólimi boıynsha kórkem fılmin jarııalady.
Romandy qazaq tilinde sóıletken – Zamanbek Ábdeshev. Tárjima jumystaryna toǵyz aı ýaqyt ketken. Aıta ketsek, «Folıant» baspasynyń bastamasy boıynsha álem ádebıetiniń altyn qazynasyna aınalǵan Haled Hosseınıdiń «Jarqyraǵan myń kún», «Batpyraýyq qýǵan bala», Mo Iаnnyń «О́mir men ólim azaby», Orhan Pamýktyń «Aq qamal», «Sezim mýzeıi», «Meniń atym Qyrmyzy», «Meniń oǵash oılarym», «Únsiz úı» týyndylary, Gýzel Iаhınanyń «Zúleıhanyń oıanýy» romany, Astrıd Lındgrenniń «Uzynshulyq Pıppı» kitaby qazaq tilinde jaryq kórgen bolatyn.