Aqtóbeniń irgesindegi Aqjar aýylynyń turǵyndary jarylǵysh zat saqtalǵan qoımany kóshirýdi talap etti. Sebebi qaýipti aımaq úılerine qolsozym jerde ornalasqan. Turǵyndar Jambyldaǵydaı jaǵdaı qaıtalansa, túgimiz qalmaıdy dep úreılenip otyr, dep habarlaıdy Egemen.kz.
Bul týraly KTK telearnasy málimdedi.
Telearna málimetinshe, quzyrly organ ókilderi qoımalardan esh qaýip joǵyn aıtqan. Biraq ol jerde jarylǵysh zattyń baryn jasyrmaıdy. Al qaýipti aımaq pen aýyl arasy nebári 150-200 metr.
«Úreıdemiz. Arysta, Tarazda bolǵan oqıǵa taǵy qaıtalansa, san soǵyp qalamyz. Ishinde burynnan qalǵan jarylǵysh zattar bolýy múmkin. Trotıl bolsa, sonyń ózi de jetedi. Ol merzimi ótkennen keıin ózinen-ózi atylady», deıdi Aqjar aýylynyń turǵyny Járdem Qaztýǵanov.
Turǵyndar úıleriniń irgesinde jarylǵysh zattyń saqtalǵanyn qalamaıdy. Sondyqtan tekserip qana qoımaı, qoımany tolyq kóshirsin dep talap qoıyp otyr.
Tikenek symmen qorshalǵan aýmaq Aqjar aýylynyń irgesine tıip tur. Qorshaýdan ary qaraı ótý qaýipti ekeni týraly ár jerge eskertý taqshaılary ilingen. Al aımaq «Kazpromgeofızıka» AQ-na tıesili.
Quzyrly organ ókilderiniń sózinshe, qoımaǵa byltyr tekserý júrgizilgen. Qoımada áskerı oq-dári emes, óndiristik jarylǵysh zat saqtalady eken. Ony munaı-gaz ken oryndaryna qoldanady.
«Bul qorǵanys mınıstrligine qaraıtyn nysan emes. Bir zarıadtyń kólemi eki jarym tonna bolsa da, aýylǵa qaýip tóndirmeıdi. Kúzeti bar. Qaýipsizdik sharalaryn saqtasa, esh qaýip bolmaıdy. Munda óndiristik jarylǵysh zattar ǵana bar», deıdi Aqtóbe oblysy óndiristik qaýipsizdik departamenti basshysynyń orynbasary Samat Tájdáýletov.
Qoıma 1960 jyldan beri bar. Kezinde qaýipsizdik komıtetindegiler ákimdikke bul mańnan úı salýǵa eshqandaı jer bermeý týraly ótinish te aıtqan eken. Biraq ony eshkim elemegen. Al endi qoımany kóshirý týraly sheshim qabyldaýǵa oılanyp otyr.