Islam yntymaqtastyǵy uıymynyń (IYU) shtab-páterinde Qazaqstan Respýblıkasy táýelsizdiginiń 30 jyldyǵyna arnalǵan «Álemdik qoǵamdastyq tanyǵan Qazaqstan» atty fotokórme ashyldy, dep jazady Egemen.kz.
Fotokórmeni Qazaqstannyń IYU janyndaǵy Turaqty ókildigi Uıymnyń Bas hatshylyǵymen birlese uıymdastyrdy.
Is-sharanyń ashylý saltanatyna IYU hatshylyǵynyń basshylyǵy men qyzmetkerleri, IYU janyndaǵy múshe memleketterdiń turaqty ókildikteriniń jáne Djıdda qalasynda akkredıttelgen bas konsýldyq basshylary, Islam damý bankiniń, Dúnıejúzilik ıslam lıgasynyń jáne basqa da halyqaralyq uıym ókilderi qatysty.
Kórmeniń ashylýynda Qazaqstannyń Saýd Arabııasyndaǵy Elshisi, QR IYU janyndaǵy Turaqty ókili Berik Aryn jáne IYU Bas hatshysynyń orynbasary Samır Baker Dıab quttyqtaý sóz sóıledi.
B. Aryn Qazaqstannyń jańa tarıhy Tuńǵysh Prezıdent – Elbasy Nursultan Nazarbaevtyń esimimen tyǵyz baılanysty ekenin atap ótip, qatysýshylardy elimizdiń táýelsizdik jyldaryndaǵy negizgi ishki saıası jáne áleýmettik-ekonomıkalyq jetistikteri, halyqaralyq arenadaǵy tabystary týraly habardar etti.
Sondaı-aq qazirgi ýaqytta Prezıdent Qasym-Jomart Toqaevtyń basshylyǵymen júrgizilip jatqan ekonomıkalyq jáne saıası reformalaryna toqtalyp ótti. Osy turǵyda otandyq dıplomat qonaqtardy Prezıdenttiń «Halyq birligi jáne júıeli reformalar – el órkendeýiniń berik negizi» atty Qazaqstan halqyna joldaýynyń negizgi qaǵıdalarymen tanystyryp, Joldaýda qazirgi kúrdeli kezeńde eldiń odan ári áleýmettik-ekonomıkalyq damýynyń negizgi vektorlary kórsetilgenine nazar aýdardy.
Elshi IYU-ǵa múshe memleketterdiń jáne Hatshylyqtyń Qazaqstannyń táýelsiz damýyna jáne onyń syrtqy saıası bastamalaryna udaıy qoldaý kórsetkeni úshin alǵys bildirip, sonyń arqasynda elimiz 2011-2012 jyldary IYU Syrtqy ister mınıstrliginiń 38-shi sessııasyna jáne 2017-2021 jyldary ǵylym men tehnologııalar jónindegi IYU-nyń birinshi sammıtine tabysty tóraǵalyq etkenin, sondaı-aq bas páteri Nur-Sultan qalasynda ornalasqan Azyq-túlik qaýipsizdigi jónindegi Islam uıymyn qurǵanyn atap ótti.
О́z kezeginde, IYU Bas hatshysynyń orynbasary S. Dıab Qazaqstan Respýblıkasy basshylyǵy men halqyn táýelsizdiktiń 30 jyldyǵymen quttyqtap, eldiń ári qaraı órkendep damýyn jáne gúldenýin tiledi.
Ol Qazaqstan uıymnyń qyzmetine qomaqty úles qosyp otyrǵan IYU-nyń belsendi músheleriniń biri ekenin atap ótti. Osy turǵyda ol Qazaqstan basshylyǵynyń Uıymnyń halyqaralyq isterdegi rólin nyǵaıtýǵa, musylman elderindegi ǵylym men tehnologııany damytýǵa baǵyttalǵan mańyzdy bastamalaryn joǵary baǵalady.
«Fotokórme qonaqtarǵa Qazaqstan damýynyń negizgi kezeńderimen, elimizde ótken iri halyqaralyq is-sharalarmen tanysýǵa, elimizdiń tabıǵı sulýlyǵy men sáýlettik landshaftaryn kórýge, sondaı-aq Qazaqstan halqynyń tarıhy, mádenıeti, dástúrleri men ómir salty týraly túsinik alýǵa múmkindik berdi.
Is-shara barysynda kelýshilerge taqyryptyq beınerolıkter kórsetildi, Elbasy N. Nazarbaev pen Prezıdent Q. Toqaevtyń kitaptary, Memleket basshysynyń joldaýy jáne táýelsizdiktiń 30 jyldyǵy qarsańynda onyń saıası jáne áleýmettik-ekonomıkalyq damýy týraly baıandaıtyn ózge de aqparattyq materıaldar taratyldy», dep jazylǵan QR SIM baspasóz habarlamasynda.