Prezıdent Djo Baıden AQSh saılaýyna sheteldikterdiń aralasý qaýpine baılanysty eldegi tótenshe jaǵdaı rejımin bir jylǵa uzartty, dep habarlaıdy Egemen.kz.
Tótenshe jaǵdaı rejımin 2018 jyldyń 12 qyrkúıeginde eks-prezıdent Donald Tramp engizgen. Bul amerıkalyq barlaý agenttikterin saılaýdan keıin 45 kún ishinde nátıjege sheteldikterdiń aralasýyn tekserýdi mindetteıdi.
«Men eldegi tótenshe jaǵdaılar týraly zańnyń 202-bólimine sáıkes, 13848 jarlyqtaǵy AQSh saılaýyna sheteldikterdiń aralasý qaýpi nemese olarǵa degen qoǵamdyq senimniń buzylýy týraly jarııalanǵan Ulttyq tótenshe jaǵdaı rejımin bir jylǵa uzartamyn», delingen Djo Baıdenniń hatynda.
Málimdemede AQSh bıliginde kez kelgen sheteldik derjavanyń AQSh-taǵy kez kelgen saılaýdaǵy nátıjelerdi nemese daýystar sanyn ózgertkeni týraly eshqandaı dálel joq ekeni, biraq sonymen qatar sheteldik derjavalar tarıhı túrde Amerıkanyń erkin jáne ashyq saıası júıesin qoldanýǵa umtylǵany kórsetiledi. «Amerıka Qurama Shtattarynan tys jerlerde jeke tulǵalardyń AQSh-taǵy saılaýǵa tolyq nemese ishinara aralasýy nemese senimine nuqsan keltirý múmkindigi, onyń ishinde saılaý ınfraqurylymyna ruqsatsyz qoljetkizý nemese nasıhat pen jalǵan aqparatty jasyryn taratý arqyly jáne ulttyq qaýipsizdik pen syrtqy saıasatqa tótenshe qater tóndiredi», delingen qujatta.Buǵan deıin AQSh-tyń burynǵy prezıdenti Donald Tramp jaqynda 2020 jylǵy prezıdenttik saılaýda zańbuzýshylyqtar bolǵany týraly jańa dálelder paıda bolatynyn málimdegen edi.