Qazaqstan Respýblıkasynyń Memlekettik hatshysy Qyrymbek Kósherbaevtyń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótti, dep habarlaıdy Egemen.kz Aqordaǵa silteme jasap.
Komıssııa sheshimimen «Bolashaq» halyqaralyq stıpendııasy magıstratýra, doktorantýra, rezıdentýra boıynsha oqıtyn, sondaı-aq álemniń jetekshi ǵylymı jáne óndiristik ortalyqtaryna taǵylymdamadan ótýge jiberiletin 196 qazaqstandyqqa berildi.
Otyrysta bilim jáne ǵylym mınıstri Ashat Aımaǵambetovtiń Shetelde kadrlar daıarlaý jónindegi respýblıkalyq komıssııanyń hattamalyq tapsyrmalarynyń oryndalýy týraly esebi tyńdalyp, «Bolashaq» halyqaralyq stıpendııasyn iske asyrýǵa qatysty birqatar máseleler qaraldy.
2021 jyly «Bolashaq» baǵdarlamasy boıynsha oqýǵa barlyǵy 1055 stıpendııa bólindi. Onyń ishinde 555 stıpendııa magıstratýra, rezıdentýra, doktorantýra, taǵylymdama baǵdarlamalary boıynsha bólingen. Taǵy 500 stıpendııa «ǵalymdar» taǵylymdamasynyń jańa sanaty boıynsha bólindi. Bul sanat Prezıdent Qasym-Jomart Toqaevtyń tapsyrmasyna sáıkes álemniń jetekshi ǵylymı ortalyqtarynda jyl saıyn 500 ǵalymnyń taǵylymdamadan ótýin qamtamasyz etý maqsatynda bekitilgen.
«Bolashaq» halyqaralyq stıpendııasyn taǵaıyndaý konkýrsyna qatysý úshin qujattardy qabyldaý aǵymdaǵy jylǵy 4 mamyrdan bastap 28 qazanǵa deıin jalǵasady.
Otyrys qorytyndysy boıynsha Qyrymbek Kósherbaev birqatar naqty tapsyrmalar berdi.