Bıylǵy qazan aıynyń úshinshi onkúndiginen bastap Qazaqstan men Saýd Arabııasy arasyndaǵy turaqty áýe qatynasyn qalpyna keltirý josparlanýda, dep habarlaıdy Egemen.kz QR IIDM azamattyq avıasııa komıtetiniń baspasóz qyzmetine silteme jasap.
Almaty-Djıdda jáne Almaty-Medına baǵyttary boıynsha Saýd Arabııasyna ushýlardy qazaqstandyq SCAT avıakompanııasy árbir baǵyt boıynsha aptasyna bir ret oryndaıdy dep boljanýda.
«Qazaqstan Respýblıkasynyń aýmaǵynda koronavırýstyq ınfeksııanyń paıda bolýy men taralýyna jol bermeý jónindegi vedomstvoaralyq komıssııa 2021 jylǵy 7 qyrkúıektegi otyrysta Qazaqstan men Saýd Arabııasy arasyndaǵy turaqty áýe qatynasyn qalpyna keltirý máselesin oń sheshti», delingen baspasóz qyzmetiniń habarlamasynda.
Saýd Arabııasyna reısterdiń odan ári ulǵaıýy epıdemıologııalyq jaǵdaıǵa, vedomstvoaralyq komıssııanyń sheshimderine jáne Saýd Arabııasynyń tıisti memlekettik organdarynyń sheshimderine baılanysty bolady.