Qostanaı oblysynyń Lısakov kórshilerine oq atqan zeınetker qaıtys boldy. Sonymen qatar oqıǵa saldarynan jaraqat alǵan áıel de kóz jumdy, dep habarlaıdy Egemen.kz.
Qalanyń №3 shaǵyn aýdanyndaǵy №18 kópqabatty úıdiń aýlasynda belgisiz bireý oq atqan.
«Búgin saǵat 11:00 shamasynda Lısakov polısııa bóliminiń 102 pýltine 3-shaǵyn aýdan turǵyn úıiniń aýlasynda belgisiz bireý qarýmen júrgeni týraly habarlama kelip tústi. Oqıǵa ornyna jedel-tergeý toby dereý jiberildi. Kúdikti kelgen polısııa qyzmetkerlerine qaraı oq atyp, saldarynan jedel-tergeý tobynyń tergeýshisi jaraqat aldy. Artynsha kúdikti úıdiń kireberisinde jasyrynǵan. Qýdalaý barysynda ol tártip saqshylaryna oq atýdy jalǵastyrdy. Turǵyndardyń qaýipsizdigi jáne kúdiktini ustaý úshin polısııa qyzmetkerleri qarý qoldanýǵa májbúr boldy jáne kúdikti jaraqat aldy. Izinshe jaraqat alǵan adam óz páterine qashyp, sol jerde ustaldy. Úıdiń kireberisinde jaraqaty bar eki áıel anyqtaldy», dep habarlaıdy atalǵan vedomstvodan.
Habarlamada aıtylǵandaı, ishki ister qyzmetkerleri zardap shekkenderge kómek kórsetý úshin oqıǵa ornyna jedel járdem shaqyrǵan.
«Alǵan jaraqatynan ustalǵan kúdikti aýrýhanada kóz jumdy. Sonymen qatar, jaraqat alǵan áıelderdiń biri qaıtys boldy.
Qazirgi ýaqytta qajetti tergeý áreketteri júrgizilip, óz kezeginde Prokýratýra organdary qarýdy qoldanýdyń zańdylyǵyn zerttep jatyr.
Aldyn ala tergeý nátıjesinde belgili bolǵandaı kórshiler arasyndaǵy qandy oqıǵa úıge jóndeý jumysyn jasaýǵa qatysty máseleden týyndaǵan. Máseleni sheshý maqsatynda 66 jastaǵy zeınetker qolyna qarý alǵan», delingen habarlamada.