Elordada 15 qyrkúıek pen 15 qazan aralyǵynda qala turǵyndary tumaýǵa qarsy ekpe ala alady. Elorda ákimdiginde ótken onlaın-brıfıng barysynda mamandar tumaýǵa qarsy ekpeni qalaı alýǵa bolatyny týraly egjeı-tegjeıli aıtyp berdi, dep jazady Egemen.kz.
«Biz 15 qyrkúıekten bastap jyl saıyn aldyn-alý maqsatynda júrgiziletin tumaýǵa qarsy vaksınasııany bastaımyz. Vaksınasııa 15 qazanǵa deıin jalǵasady jáne ol bekitilgen jerdegi alǵashqy medısınalyq-sanıtarlyq kómek uıymdarynda júzege asyrylady. Ony belgili bir sanattaǵy adamdar tegin ala alady, qalǵan azamattar óz emhanalary men jeke uıymdaryna júginý arqyly óz esebinen vaksınasııalana alady», dedi Qoǵamdyq densaýlyq saqtaý basqarmasynyń basshysy Tımýr Muratov.
Vedomstvo basshysy óz sózinde vaksınasııa qazirgi ýaqytta qaýiptiń aldyn-alý úshin eń jaqsy qural ekenin eske saldy.
«Vaksına aýyr asqynýdy, tipti ólim qaýpin azaıtady. DDSU málimetteri boıynsha vaksına 18-64 jas aralyǵyndaǵy saý eresekterde ınfeksııanyń shamamen 60%-yn boldyrmaıdy. Tumaýǵa qarsy vaksınany alǵan soń tıimdiligi shamamen 14 kúnnen soń bilinedi», dedi T. Muratov.
Onyń málimetinshe, qala turǵyndaryn tumaýǵa qarsy vaksınasııalaý úshin elordaǵa 160 myń doza vaksına jetkizilgen. Bizde 3 600 mektep oqýshysyn, 1 900-ge jýyq júkti áıeldi, 2 500 medısına qyzmetkerin, sozylmaly aýrýlary bar 13 000 eresekti tumaýǵa qarsy tegin egýdi josparlanǵan.