Dárigerler Tarazda aıaldamalardyń birinde bolǵan jol apatynan zardap shekkenderdiń jaǵdaıy týraly aıtty, dep habarlaıdy Egemen.kz.
Dárigerlerdiń aıtýynsha, 15 qyrkúıekte saǵat 7.00 shamasynda jedel járdem stansııasyna qońyraý túsken. Myńbulaq yqshamaýdanyndaǵy apattan zardap shekkenderge medısınalyq kómek qajet bolǵan.
«Barlyǵy tórt adam jaraqat aldy. Olardyń bireýi reanımasııaǵa jatqyzyldy, qajetti em júrgizilip jatyr. Oǵan mı shaıqalýy, aıaǵynyń ortańǵy úshten bir bóliginiń jabyq synýy jáne oń jaqtaǵy tórtinshi jáne besinshi saýsaqtardyń ashyq synýy, bassúıek-serebraldy jabyq jaraqaty dıagnozy qoıylǵan.
Taǵy bir adamǵa alǵashqy medısınalyq kómek kórsetildi. Onyń basy jaralanyp, mıy shaıqalǵan. Oǵan emhanada ambýlatorlyq em qabyldaý usynyldy», dedi Jambyl oblysynyń densaýlyq saqtaý basqarmasy ókilderi.
Bólim málimetinshe, taǵy eki áıel jedel járdem brıgadasy kelgenge deıin qaza bolǵan. Olardyń jasy shamamen 40-45 jáne 60-65 jas aralyǵynda. Tarazdaǵy jantúrshigerlik jol apaty týraly buǵan deıin jazǵan bolatynbyz. Oqıǵa 15 qyrkúıek saǵat 7:20-da bolǵan. S. Seıfýllın kóshesinen B. Momyshuly kóshesine bara jatqan Hyundai markaly avtokólik júrgizýshisi tórt adamdy qaǵyp ketken.