El Táýelsizdiginiń 30 jyldyǵyna oraı kórnekti jazýshy, ekinshi dúnıejúzilik soǵystyń ardageri, qazaq ádebıeti tarıhynda búginge deıin eń kóp roman (17) jazǵan jazýshy Ilııas Esenberlınniń 6 tomdyq shyǵarmalar jınaǵy jaryq kórdi, dep jazady Egemen.kz Mádenıet jáne sport mınıstrligine silteme jasap.
Jınaqqa jazýshynyń barlyq shyǵarmasy kirdi. Endi kez kelgen oqyrman «Kóshpendiler», «Altyn Orda» syndy tarıhı epopeıamen qatar keńes úkimeti kezinde jaryq kórgen eńbekterdi qazaq jáne orys tilinde oqı alady.
Memleket basshysy Qasym-Jomart Toqaev oqyrmandarǵa arnaǵan úndeýinde Ilııas Esenberlınniń eńbekterin tereń zertteýsiz qazaq tarıhyn bilý múmkin emes ekenin atap ótti.
Jalpy Ilııas Esenberlınniń kóptomdyǵyn basyp shyǵarý – oqyrman qaýym úshin mańyzdy mádenı oqıǵa. Jazýshynyń shyǵarmalary elimizde ǵana emes, alys-jaqyn shet memleketterde de keńinen tanylǵan. Búginge deıin Ilııas Esenberlın kitaptary 7 mıllıon tırajben 30-dan astam tilge aýdaryldy. Bul bizdiń elimizdegi jazýshylardyń eńbekteri arasyndaǵy eń kóp taralym. Zerdeli tulǵa shyǵarmalarynyń tolyq jınaǵy bizdiń tarıhı jadymyzdy jańǵyrtýǵa úles qosyp, jas urpaq arasynda týǵan elge degen súıispenshilik pen otansúıgishtikti arttyrýǵa septigin tıgizedi.
Tuńǵysh Prezıdent – Elbasy Nursultan Nazarbaev «Kóshpendiler» trılogııasyn «qazaq halqy ómiriniń ensıklopedııasy» dep, jazýshy shyǵarmashylyǵyna joǵary baǵa bergen edi.