Keshe Premer-Mınıstr Serik Ahmetov Astanada Qazaqstannyń Ulttyq kásipkerler palatasy ókilderimen kezdesti. Keleli keńeske qurylǵan jıynǵa Úkimet basshysy ózi tóraǵalyq etti. Keńeste eldegi kásipkerlikti damytý sharalary sóz boldy.
Keshe Premer-Mınıstr Serik Ahmetov Astanada Qazaqstannyń Ulttyq kásipkerler palatasy ókilderimen kezdesti. Keleli keńeske qurylǵan jıynǵa Úkimet basshysy ózi tóraǵalyq etti. Keńeste eldegi kásipkerlikti damytý sharalary sóz boldy.
Kezdesýge Úkimet quramy tolyq derlik keldi. Onymen qatar, Parlament depýtattary men «Samuryq-Qazyna» UÁQ» AQ-tyń basshylary, sondaı-aq, birneshe ulttyq kompanııalardyń jetekshileri qatysty. Al, Ulttyq kásipkerler palatasynyń Astanadaǵy apparaty men aımaqtardan kelgen ókilderi ústel basynan oryn aldy.
Otyrysty ashqan Premer-Mınıstr Memleket basshysy Nursultan Nazarbaev «Qazaqstan joly – 2050: bir maqsat, bir múdde, bir bolashaq» atty halyqqa Joldaýynda elimizde shaǵyn jáne orta bıznesti damytýǵa aıryqsha kóńil bólgenin aıtty.
«Sondyqtan búgingi kezdesý kezdeısoq ótip otyrǵan joq. Biz búgin kásipkerlikti damytýǵa kedergi keltiretin máselelerdiń bárin ashyq talqylaımyz. Sóıtip, olardy sheshý joldaryn da qarastyrýǵa tıispiz. Osyny negizge alyp, árqaısyńyz jumystaryńyzda týyndap jatqan problemalar jóninde pikir bildirýlerińizge bolady», dedi. Sóıtip, Ulttyq kásipkerler palatasy eldegi bıznesti damytý jolynda Úkimettiń áriptesi ekendigin eske saldy.
Premer-Mınıstr alǵashqy sóz kezegin palatanyń basqarma tóraǵasy A.Myrzahmetovke berdi. Tóraǵa Prezıdent Joldaýynda shaǵyn jáne orta bızneske qatysty berilgen tapsyrmalar týraly aıta kelip, saladaǵy kóptegen túıtkildi máseleler jóninde áńgimeledi. «Atameken» Odaǵy» Ulttyq kásipkerler palatasy memlekettik qoldaý kórsetý quraldaryna tekseris júrgizýge múddeli ekenine toqtaldy. «Qazirgi ýaqytta basymdyq beriletin salalar belgili, memlekettik qoldaý kórsetý quraldarynyń barlyǵyna tekseris júrgizý qajet. Búgingi kúni palata aıasynda klasterlik saıasat boıynsha qyzý pikirtalas pen talqylaý júrgizilýde. Jergilikti jerlerde aımaqtyq klasterdi qamtamasyz etý máselelerine kóńil bólinip jatyr», dedi A.Myrzahmetov.
Sondaı-aq, basqarma tóraǵasy kásipkerlerge qarjy quraldarynyń qoljetimdiligi máselesi de ózekti ekenin aıtty. «Osy máseleni sheshý úshin konsýltanttardyń 2 toby qurylýda. Investısııa tartý salasynda túrik tájirıbesin qoldanýdy kózdep otyrmyz», dep tolyqtyrdy ol óz sózin. A.Myrzahmetovten keıin kezek-kezegimen sóz alǵan kásipkerler jumys úderisi kezinde kezdesetin kedergiler jóninde áńgimeledi. Solardyń biri óndirilgen taýarlardy sertıfıkattaý máselesi eken. Máselen, Qazaqstanda berilgen sertıfıkat Reseıdiń memlekettik organdarynda moıyndalmaıtyn kórinedi. Sondaı-aq, birneshe jyldan beri úzilissiz shyǵarylyp jatqan ónimdi jyl saıyn qaıta sertıfıkattap otyrýdyń qanshalyqty qajet ekendigi de aıtylyp qaldy. Premer-Mınıstr bul problemalar taıaý ýaqytta sheshimin tabýǵa tıis ekenin orynbasarlaryna eskertti.
Kezdesýde birqatar vedomstvo basshylary men Ulttyq palatanyń qyzmetkerleri sóz sóılep, shaǵyn jáne orta bıznesti damytý joldary týraly ózderiniń usynys-pikirlerin ortaǵa saldy.
– Ulttyq kásipkerler palatasy men memleket jáne bıznes arasynda tyǵyz baılanys ornaýy tıis. Prezıdent kásipkerlerdi toptastyrý bıznesti damytýdyń jáne jalpy alǵanda, ekonomıkany ósirýdiń mańyzdy faktorlarynyń biri ekenin birneshe ret aıtty. Osy oraıda, Úkimettiń quzyretti seriktesi retinde Ulttyq kásipkerler palatasynyń rólin atap ótkim keledi. Ol memleket pen bıznes arasynda tyǵyz baılanys ornatyp, bizdiń kásipkerliktiń qorǵanyshy men tiregi bolýy tıis. Qazirgi ýaqytta barlyq uıymdastyrý jumystary aıaqtalyp, aýdan, qalalarǵa deıin qamtıtyn tıisti qurylym jasaldy. Endigi kezekte barlyq deńgeıde onyń tıimdi jáne syndarly qyzmet etýin qamtamasyz etý qajet, – dep qorytyndylady sózin S.Ahmetov.
Nurbaı ELMURATOV,
«Egemen Qazaqstan».