Jaqynda bas shaharda kórnekti memleket jáne qoǵam qaıratkeri Jumabek Táshenovke eńseli eskertkish qoıylyp, tuǵyrly tulǵa halqymen qaıta qaýyshty. Aıta keteıik, elordadaǵy Ulttyq mýzeıde ardaqty azamattyń kózi tirisinde ózi tutynǵan biraz jádigerleri saqtalǵan.
Bul jádigerlerdi mýzeıge 2015 jyly «Ulttyq mýzeıge syı tartý» aksııasy aıasynda qaıratkerdiń uly Saıan Jumabekuly tapsyrypty. Onyń ishinde Jumabek aǵamyzdyń qalta saǵaty, kózildirigi, qoljazbalary jáne Lenın ordeni men depýtattyq kýáligi bar.
Jumabek Táshenov qazirgi Aqmola oblysy Arshaly aýdanyndaǵy Tanakól degen aýylda ómirge kelip, alǵashqy eńbek jolyn óziniń týǵan jerinen bastaıdy. Ekinshi dúnıejúzilik soǵys kezinde Aqmola men Soltústik Qazaqstan oblysynda jaýapty qyzmetter atqaryp, 1952-55 jyldary Aqtóbe oblysy partııa komıtetiniń birinshi hatshysy boldy. Odan keıin Qazaq KSR Joǵarǵy keńesi tóralqasynyń tóraǵasy, 1960 jyly Qazaq KSR Mınıstrler keńesiniń tóraǵalyǵyna taǵaıyndalyp, osy qyzmette júrgende qazaq jeriniń tutastyǵyn saqtap qalýǵa kóp eńbek sińirdi. Dál sol jyldary Tyń ólkesine biriktirilgen soltústik oblystardy Reseıge, ońtústiktegi maqta ósiretin aýdandardy О́zbekstanǵa berý jóninde másele kóterilgende, soǵan birden qarsylyq kórsetti. Sonymen birge Mańǵystaýdy Túrikmenstanǵa qosý týraly usynysqa da kelisim bermegen. Sondaı-aq aqyn-jazýshylarymyzdyń úni «Qazaq ádebıetin» jabý men sol kezdegi respýblıkalyq «Sosıalıstik Qazaqstan» gazetin «Kazahstanskaıa pravdanyń» aýdarmasy etip shyǵarýǵa qarsy bolyp, ulttyq basylymdardyń jabylyp qalmaýyna qaıratkerlik tanytty.Osylaı týǵan halqynyń qorǵany bolǵan esil erge «ultshyl» degen jala jabylyp, Hrýshevtiń nusqaýymen qyzmetten bosatylyp, 1961 jyly búgingi Túrkistan oblysyna kishigirim qyzmetke jiberildi. Asyl azamat 1986 jyly Shymkent qalasynda 71 jasynda dúnıeden ozdy.